Astanada balalar úıleri tárbıelenýshileriniń arasynda týrnır ótti
ASTANA. 9 jeltoqsan. QazAqparat - Astanadaǵy «Velotrek» jáne «Astana-Arena» sport keshenderinde shaǵyn fýtbol, voleıbol, ústel tennısi, júzý, doıby jáne kóńildi starttardan alǵash ret Astana qalasy balalar úıleri tárbıelenýshileriniń arasynda týrnır ótti.
Týrnırge «SOS Astana balalar aýyly», «№1-shi balalar úıi», «Kámeletke tolmaǵan balalarǵa arnalǵan pana» balalar úıleriniń tárbıelenýshileri, barlyǵy 100-den astam bala qatysty. Sharanyń maqsaty - balalar úıleriniń tárbıelenýshileri arasynda sport jáne dene tárbıesin damytý, salaýatty ómir saltyn engizýdi nasıhattaý, óskeleń urpaqtyń patrıottyq tárbıesin kúsheıtý, balalardy turaqty túrde sportpen shuǵyldanýǵa baýlý.
Sport básekesiniń ashylý saltanatynda Astana qalasy sport basqarmasynyń jáne balalar úıleriniń basshylyǵy, «Barys» hokkeı klýbynyń ókilderi, «Jas Otan» jáne «Bolashaq» uıymdarynyń ókilderi boldy.
"Sizderge búgin ádil jarys tileımin. Erteń osynda otyrǵan jas balǵyndar sportshy, dıplomat, jýrnalıst bolar, ár túrli qyzmettiń basyn ustaǵan myqty sala mamandary atanady. Bul mamandyqtardyń barlyǵy elimizge qajet. Al eń aldymen adal, isi aq, ary taza adamdar kerek. Bizge senimdi ári batyl azamattar qajet", - dedi «Barys» hokkeı klýbynyń ókili Evgenıı Maslov balalarǵa qaratyp aıtqan sózinde.
Uıymdastyrýshylar: QR Sport jáne dene shynyqtyrý isteri jónindegi agenttigi men QR Sport ındýstrııasyn damytý jónindegi qaýymdastyǵy.
