Astanada balalar shyǵarmashylyǵyna arnalǵan vaýcherlik baǵdarlamaǵa qatysty shaǵym tústi
ASTANA. KAZINFORM — Astana qalasy Kásipkerler palatasynyń Kásipkerler quqyǵyn qorǵaý jáne sybaılas jemqorlyqqa qarsy is-qımyl jónindegi keńestiń otyrysynda elordadaǵy memlekettik shyǵarmashylyq tapsyrysty oryndaý kezindegi problemalar qaraldy.
— Astana qalasynyń Kásipkerler palatasyna balalar sporty men shyǵarmashylyǵyna arnalǵan vaýcherlik memlekettik baǵdarlama boıynsha qyzmet kórsetetin kásipkerlerden shaǵym tústi. Olar baǵdarlamany iske asyrý kezinde bolǵan máselelerge nazar aýdarýdy surap otyr. Elordanyń Mádenıet basqarmasynyń resmı jaýabyna sáıkes, 2024 jyldyń 29 qarashasynda tehnıkalyq aqaý bolyp, elektrondy kezek joıylǵan. Sonyń saldarynan barlyq ótinim men vaýcherlerdiń derekteri joǵalǵan, — dedi qalalyq Kásipkerler palatasynyń kásipkerler quqyǵyn qorǵaý bólimindegi birinshi sanattaǵy sarapshy Gúljaına Pernebaı.
Onyń aıtýynsha, elektrondy kezek joıylǵannan keıin, sol kezden bastap vaýcherler ashyq júıe arqyly emes, qolmen berilip jatyr.
— Bul jaǵdaı tsıfrlyq júıeniń talaptaryna jáne barlyq balaǵa teń múmkindik berý qaǵıdatyna qaıshy keledi. Osyǵan baılanysty qyzmet kórsetetin uıymdar protsesti baqylaı almaı otyr, al balalar tegin qosymsha bilim alý quqyǵynan aıyrylǵan. Osy ahýal saldarynan kásipkerler shyǵynǵa batyp, vaýcherlik qarjylandyrý júıesine senim azaıyp barady. Aıta keteıik, mundaı jaǵdaıǵa arnalǵan naqty zańdy tetikter men jedel áreket etý tártibiniń bolmaýy alańdatyp otyr, — dedi sarapshy.
Óz kezeginde qaladaǵy Memlekettik shyǵarmashylyq tapsyrysty iske asyrý dırektsııa ókilderi atalǵan másele boıynsha ótinim bergen barlyq ata-ana men kásipkerlerdi qabyldaǵanyn aıtyp otyr. Endi barlyq ótinim men kezek QOSYMSHA.KZ jańa tsıfrlyq platformasyna aýysady. «ArtSportta» qamtylǵan úıirmeler jańa platformaǵa kóshirilgen.
Buǵan deıin bıýdjet esebinen qarjylandyrylatyn bilim berý, sport jáne shyǵarmashylyq baǵyttaǵy balalar úıirmeleri biryńǵaı vaýcherge biriktirilýi múmkin ekenin jazǵan edik.
Bıyl tegin úıirmeler boıynsha Astanada jańa tsıfrlyq vaýcherlik júıe iske qosylǵany málim boldy.
Aıta keteıik, 2021 jyldan beri Qazaqstanda qosymsha bilim berýge arnalǵan vaýcherlik qarjylandyrý júıesi júzege asyrylyp keledi. Prezıdenttiń tapsyrmasyna sáıkes, bul bastama balalarǵa sabaqtan tys ýaqytta bilim alýǵa teń múmkindik berý maqsatynda engizilgen. Qaǵıda qarapaıym: memleket ár balaǵa bir úıirmege qatysýyna qarjy bóledi, al ata-ana balasynyń qyzyǵýshylyǵy men kestesine saı baǵytty ózi tańdaıdy.