Astanada balalar merekesi burynǵy jáne jańa Oqýshylar saraıynda ótýde
ASTANA. 1 maýsym. QazAqparat - Aýa raıynyń jańbyrly bolýyna qaramastan, kishkentaı astanalyqtarǵa merekelik is-sharalar uıymdastyrylýda.
Tek, is-sharalardyń ótetin orny men ýaqyty ózgertildi. 1 maýsymǵa josparlanǵan barlyq is-sharalar burynǵy jáne jańa Oqýshylar saraıyna aýystyryldy. Bastalýy - 11.00, dep habarlady Astana qalasy ákimdiginiń resmı saıty.
Búgin «Balalyq boıtumary» oıyn-saýyq baǵdarlamasy men «Balalar - elorda júregi» merkelik kontsert baldyrǵandar nazaryna usynylady. Sondaı-aq «Talanttar men jankúıerler» kontserttik baǵdarlamasy, «Báıterek» horeografııalyq ansambli, «Jaryq juldyz» bı ansambli, estradalyq ánder stýdııalary: «Astana jastyǵy», «Aqsha bulttar», «Juldyzdy sát», «Gúldáýren», «Altyn dán» horeografııalyq stýdııasy men «Baldyrǵan» halyqtyq tsırki kishkentaı kórermenderge shattyq pen kóterińki kóńil-kúı syılaıdy.
Sonymen qatar Halyqaralyq balalardy qorǵaý kúnine oraılastyrylǵan merekelik is-sharalar QR Tuńǵysh Prezıdenti murajaıynda da ótkiziledi. Munda 10.00-den 13,00-ge deıin «Murajaılyq balalyq tramvaıy», 10.00-den 17.00-ge deıin Qazirgi zaman óneri murajaıynda «Astana - maǵan, al, men súıikti qalama...» balalardyń kórkem shyǵarmashylyq kórmesi uıymdastyrylady.
Sondaı-aq búgin balǵyn astanalyqtar úshin qala boıynsha «Tegin júrý» aktsııasy júrip, tegin balmuzaq pen shyryndar úlestiriledi.
