Astanada balalar men jasópirimder arasynda blıtsten shahmat týrnıri ótti
ASTANA. QazAqparat - QR Táýelsizdiginiń 25 jyldyǵyn merekeleý qurmetine elorda ákimdiginiń qoldaýymen Astanada balalar arasynda blıtsten shahmat týrnıri ótti. Jarysty qalalyq dene shynyqtyrý jáne sport basqarmasy jáne qalalyq shahmat mektepteri uıymdastyrdy, dep habarlaıdy qala ákimdiginiń saıty.
Sharanyń saltanatty ashylýyna Astana qalasynyń ákimi Áset Isekeshev, FIDE prezıdenti Kırsan Ilıýmjınov, 12-shi álem chempıony Anatolıı Karpov, shahmat áleminiń basqa da belgili tulǵalary qatysty.
Uıymdastyrýshylardyń aıtýynsha, bul - balalardyń yntasyn arttyrýǵa baǵyttalǵan qalalyq aýqymdaǵy alǵashqy týrnır. Biraq sharanyń basty maqsaty shahmatty, salaýatty ómir saltyn nasıhattaý jáne sporttyq sheberlikti jetildirý. Shahmat jarysyna 8, 14 jáne 18 jas aralyǵyndaǵy alty jas tobynda 90-ǵa jýyq bala qatysýda.
Astana ákimi Áset Isekeshev qatysýshylardy QR Táýelsizdigi kúnimen quttyqtap, týrnırge kelgen qonaqtarǵa jáne aty ańyzǵa aınalǵan shahmatshy Anatolıı Karpovqa alǵys bildirdi.
«Biz bul merekeni erekshe atap ótip jatyrmyz, bul biz úshin mereıtoı. Jumys kestesiniń tyǵyzdyǵyna qaramastan, búgin osynda kelgenińizge qýanyshtymyn. Bizdiń balǵyndar bolashaqta álem chempıondary bolatynyna senimdimin. Shahmat ıntellektýaldy sport túri, ıntellekt - ınnovatsııalardy damytý úshin Qazaqstanǵa jáne basqa da elderge qajet», - dedi Áset Isekeshev.
«Barshańyzdy Táýelsizdiktiń 25 jyldyǵymen quttyqtaımyn, bir býyn úshin bul eleýli damý joly. Osy jyldar ishinde Qazaqstanda shahmat jaqsy damydy. Álem chempıondary da bar, grossmeısterler de bar. Qazaqstanda shahmattyń qyzdar arasynda keń taraǵany tań qaldyrady, olar bul salada zor jetistikterge jetti. Barlyǵyńyzdy quttyqtaımyn, tabys pen jańa bıikterdi baǵyndyrýdy tileımin», - dep málim etti jýrnalısterge suhbat bergen belgili shahmatshy Anatolıı Karpov.
Sharaǵa álem chempıondary Dınara Sádýaqasova men Jansaıa Ábdimálik te qatysty. Jansaıa Ábdimáliktiń aıtýynsha, aty ańyzǵa aınalǵan shahmatshylarmen bir alańda bolý balalardy jeńiske jetýge yntalandyrady, patrıottyq sezimge tárbıeleıdi. Týrnır sheńberinde suhbat bergen Jansaıa Katarda ótetin álem chempıonatyna daıyndalyp júrgenin jáne álemdik deńgeıde Qazaqstannyń atyn shyǵarý úshin bar kúshin salatynyn jetkizdi.
Týrnır FIDE erejeleri boıynsha shveıtsarııalyq júıemen 11 týrmen ótti. Jalpy esepte jarys jeńimpazdary men júldegerleri alty jas toby boıynsha baǵaly syılyqtarmen jáne dıplomdarmen marapattalady.
