Astanada balalar quqyǵyn qorǵaýǵa arnalǵan konferentsııa ótti
ASTANA. Jeltoqsannyń 4-i. QazAqparat /Jasulan Amanbaıuly/ - QR Syrtqy ister mınıstrliginde «BUU-nyń Balalar quqyǵy týraly konventsııaǵa 20 jyl: QR-daǵy qazirgi zamanǵy talaptar men ınnovatsııalyq tásilder» atty konferentsııa bolyp ótti,
dep habarlaıdy QazAqparat.
Balalar quqyǵy týraly konventsııa osydan jıyrma jyl buryn, qarashanyń 20-synda BUU-nyń Bas Assambleıasynda qabyldanǵan. Bul qujat barlyq 193 eldiń qoldaýyna ıe boldy. Qazaqstan atalmysh konventsııany 15 jyl buryn ratıfıkatsııalaǵan. Bul óz kezeginde balalardyń kózqarastaryn, quqyqtaryn halyqaralyq quqyq deńgeıinde qaraýǵa múmkindik berdi. Sonymen qatar, Balalardyń erkindigi hartııasy atandy. Onyń 54 baby 10 jyldyq kelissózderdiń qorytyndysy. Onda balalardyń quqyqtary tolyq kórsetilgen. Ekonomıkalyq, áleýmettik-mádenı quqyqtarynan bastap, balalardyń saıası-azamattyq quqyqtary kórsetilgen.
Qazaqstan bala quqyqtaryna qatysty BUU-nyń Arnaıy komıteti aldynda úsh ret esep berdi. Uıym elimizdiń osy saladaǵy ahýalyn joǵary baǵalady.
Konferentsııa jumysyna QR Adam quqyqtary jónindegi ýákil Asqar Shákirov, QR Bas prokýrory Qaırat Mámı, Syrtqy ister mınıstriniń birinshi orynbasary Nurtaı Ábiqaev, QR Parlamenti Májilis Tóraǵasynyń orynbasary Sergeı Dıachenko, BUU-nyń Balalar qory, Eýropalyq Odaqtyń Qazaqstandaǵy ókildigi, shet memleketterdiń Qazaqstandaǵy elshilikteriniń basshylary jáne basqa da memlekettik organdardyń ókilderi qatysty.
QR Adam quqyqtary jónindegi ýákil Asqar Shákirovtiń atap ótkenindeı, Qazaqstan konventsııany qabyldaǵan jyldar ishinde balalar quqyǵyn saqtaý baǵytynda birqatar súbeli isterdi jasap úlgergen. Elde arnaıy organ - Balalar quqyqtaryn qorǵaý komıteti quryldy, «Qazaqstan balalary» atty 2007-2011 jyldarǵa arnalǵan ulttyq baǵdarlama qabyldandy, 2009-2011 jyldarǵa arnalǵan «ıÝvenaldy sot júıesin damytýdyń kontseptsııasy» baǵdarlamasy júrgizilýde.
«N.Nazarbaev óziniń «tikeleı jeli» arqyly sóılegen sózinde barlyq memlekettik organdardyń, jergilikti jerdegi basshylyqtarǵa óskeleń urpaqtyń ómiri men damýyna úlken kóńil bólýdi tapsyrdy. Al jastardyń ózekti máseleleri jeterlik. Máselen, memleket qaraýynda 16 myńnan asa jetim bala bar. Elimizde áleýmettik jaǵdaıy nashar otbasylarda jáne bilim alýǵa múmkinshiligi tómen 34 myń jetkinshek turady. Balalar nashaqorlyǵy, balalardyń eńbegin paıdalaný, olardyń arasyndaǵy qylmystyq ahýal - osynyń bári kezek kúttirmeı sheshetin ister», dedi A. Shákirov.
