Astanada balalar quqyqtaryn qorǵaý jónindegi komıssııalardyń jumysy kúsheıtildi
ASTANA. KAZINFORM – Astana qalasynda balalar sany ósip keledi. Búginde elordada 545 myńnan astam bala turady, jyl saıynǵy ósim – 20 myńnan astam. Bul úrdis kámeletke tolmaǵandardyń quqyǵyn qorǵaý men qaýipsizdigin qamtamasyz etýdiń mańyzdylyǵyn aıqyndaıdy. Osy baǵyt memlekettik saıasat pen jergilikti atqarýshy organdardyń basty nazarynda tur.
Astana qalasynyń Kommýnıkatsııalar qyzmetinde ótken brıfıngide Balalardyń quqyqtaryn qorǵaý basqarmasynyń basshysy Serik Ádilbaev, bala quqyqtary jónindegi ýákil Ásıma Bımendına, sondaı-aq Polıtsııa departamentiniń Qoǵamdyq qaýipsizdik basqarmasy bastyǵynyń orynbasary polıtsııa podpolkovnıgi Erkin Janabil balalardyń quqyqtaryn qorǵaý boıynsha atqarylyp jatqan jumystar týraly aqparat berdi.
Qala ákimdigi ár balanyń qaýipsiz ortada ósýi, bilim alýy jáne jan-jaqty damýy úshin turaqty túrde qajetti sharalar qabyldap keledi. Qazaqstan Respýblıkasy Prezıdenti Ákimshiliginiń tapsyrmasymen jáne Balalar quqyqtary jónindegi ýákildiń bastamasymen óńirlerde Balalardyń quqyqtaryn qorǵaý basqarmalary qurylýda. Astanada bul basqarma 2023 jyldyń basynan qyzmet atqaryp keledi.
Basqarmanyń negizgi mindeti – balalardyń negizgi quqyqtary men zańdy múddelerin qorǵaýdy úılestirý, quqyq buzýshylyqtardy erte anyqtaý, sondaı-aq olardy qalpyna keltirý jáne qorǵaý boıynsha sharalar qabyldaý. Sonymen qatar basqarma bilim berý, densaýlyq saqtaý, áleýmettik qorǵaý, mádenıet jáne sport salalarynda balalar múddesine baǵyttalǵan memlekettik saıasatty júzege asyrady.
Balalardyń quqyqtarynyń saqtalýyn baqylaý jáne qabyldanǵan sharalardyń tıimdiligin monıtorıngteý de basqarmanyń quzyretine jatady. Qorǵanshylyq jáne qamqorshylyq fýnktsııalary erekshe nazarda. Profılaktıkalyq jumystar uıymdastyrylyp, ómirlik qıyn jaǵdaıdaǵy balalarǵa jeke súıemeldeý kórsetiledi.
Mobıldi toptar anyqtaǵan ómirlik qıyn jaǵdaıda turǵan balalar men olardyń ata-analary nemese zańdy ókilderi tárbıeleý jáne asyraý mindetterin oryndamaıtyn kámeletke tolmaǵandar da baqylaýǵa alynady. Bul sharalar táýekelderdi erte anyqtap, balalarǵa ýaqtyly áleýmettik jáne quqyqtyq kómek kórsetýge baǵyttalǵan.
Balalardyń quqyqtaryn qorǵaý basqarmasy bilim berý, densaýlyq saqtaý, quqyq qorǵaý organdary jáne áleýmettik qyzmetter arasyndaǵy úılestirýshi ról atqarady. Mundaı tásil táýekelderdi tıimdi anyqtaýǵa jáne quqyq buzýshylyqtardyń aldyn alýǵa múmkindik beredi. Óńirlik ýákiletti organ qyzmetkerleri memlekettik organdar men uıymdarǵa kedergisiz kirýge quqyly, olardyń qyzmetine kedergi jasaý ákimshilik jaýapkershilikke ákep soǵady.
Zańnamaǵa sáıkes, ýákiletti organdar mindetti súıemeldeýge jatatyn kámeletke tolmaǵandardyń alty sanatyn anyqtaǵan. Olarǵa táýekel tobyndaǵy balalar, otbasyny qoldaý jáne psıhologııalyq kómek ortalyqtarynyń baqylaýyndaǵy balalar, sondaı-aq kámeletke tolmaǵandar isteri jáne olardyń quqyqtaryn qorǵaý jónindegi komıssııalarda qaralǵan balalar kiredi.
2025 jyly qurylǵan Kámeletke tolmaǵandardyń isteri jáne olardyń quqyqtaryn qorǵaý jónindegi aýdandyq komıssııalar profılaktıkalyq sharalardyń tıimdiligin arttyrdy. 2026 jyldyń birinshi toqsanynda komıssııa 14 otyrys ótkizip, 78 materıal qarady. Bul kórsetkishter 2025 jylǵy jalpy nátıjelermen salystyrǵanda joǵary deńgeıde. Balalardyń qaýipsizdigi máseleleri memlekettik jáne quqyq qorǵaý organdarymen birlesken keńesterde júıeli túrde talqylanady.
Elordada ómirlik qıyn jaǵdaıdaǵy balalardy anyqtaý kezinde jedel áreket etý algorıtmi engizilgen. Bıylǵy jyldyń basynan beri 320 jedel shyǵý júzege asyrylǵan. Balalardyń quqyqtaryn qorǵaý máseleleri boıynsha keńes alý jáne psıhologııalyq kómek alý úshin barlyq uıymdarda «111» baılanys ortalyǵynyń QR-kodtary ornalastyrylǵan.
Qazirgi ýaqytta basqarmanyń súıemeldeýinde shamamen 3 myń bala bar. Bıyl 700-den astam kámeletke tolmaǵan balaǵa barý júrgizilgen, 300-ge jýyq bala psıhologııalyq kómek alǵan. Іshki ister organdarynda esepte turǵan 160 bala jeke keıs-menedjment aıasynda baqylaýda.
Quqyq buzýshylyqtardyń aldyn alý maqsatynda ishki ister organdarynda esepte turǵan balalarǵa tálimgerler bekitilgen. Qazirgi tańda 159 bala jeke qoldaýmen qamtylǵan. Aldyn alý sharalary oqý oryndarynda túsindirý jumystaryn, ata-analar jınalystaryn, quqyq qorǵaý organdarymen kezdesýlerdi, reıdter men jasóspirimderdiń minez-qulqyn baqylaýdy qamtıdy. Kámeletke tolmaǵandar jasaǵan quqyq buzýshylyqtar 60,6%-ǵa azaıǵanymen, balalarǵa qatysty qylmystar 5,6%-ǵa óskeni tirkelgen.
Buǵan deıin balabaqsha men kolledj pedagogterin qorǵaýdyń qosymsha tetigi engizilgenin habarlaǵanbyz.
