Astanada balalar arasynda jaraqat alý jaǵdaılary jıilep ketti
ASTANA. 27 shilde. QazAqparat - Astanada balalar arasynda jaraqat alý jaǵdaılary jıilep ketti, munyń saldary ádette múgedektikke nemese ólimge ákeledi. Bul týraly astana.kz saıtyna elordalyq salaýatty ómir saltyn qalyptastyrý ortalyǵynan habarlady.
«Qazirgi ýaqytta Astanada balalardyń bıikten qulaýynyń 25 oqıǵasy tirkeldi, sonyń ishinde: 5 jasqa deıingi balalar - 14, 15 jasqa deıingi balalar - 10. Terezedegi moskıt torynan qulap, kóz jumǵan 5 oqıǵa tirkeldi»,- dep habarlady ortalyqtan.
Jalpy, Qazaqstan boıynsha jaraqattanýshylyq statıstıkasy kóńil kónshiterlik emes. 2013 jyldyń birinshi jartyjyldyǵynda ótken jyldyń sáıkes merzimimen salystyrǵanda 662 óndiristik jaraqattanýshylyqtyń jaǵdaıy (680, 2012j.) oryn alǵan, sonyń ishinde, 9 (7) adam mert boldy. Bıikten qulaǵan 51 adamnyń (50, 2012 j.) úsheýi (3) kóz jumdy.
Jol ústinde jaraqat alý oqıǵalary da kóbeıip bolyp otyr. Bıyl eresekter arasynda osyndaı 866 jaǵdaı tirkeldi (679 -2012), sonyń ishinde 8 (8) adam qaza tapty, balalar arasynda 114 (87) oqıǵa tirkeldi, 1 bala mert boldy.
Bıikten qulaý jaǵdaılary da jol-kólik oqıǵalary sekildi adamnyń jıi mert bolýyna ákelip soǵady. Eńbekke jaramdy azamattar arasynda mundaı jaǵdaılarǵa kóbine qurylys mamandary ushyraıdy. Ásirese, egde jastaǵy azamattar úshin qulaýdyń saldary óte aýyr bolady.
«Ortalyqtyń habarlaýynsha, balalardyń moskıt torynan qulaýyna erekshe nazar aýdarý kerek. Ata-analardan kóp qabatty úılerde balalardy terezege jaqyndatpaı, muqııat bolýlaryn suraımyz»,-deıdi ortalyq mamandary.
