Astanada balalar arasynda qyzylsha aýrýy kóbeıgen
ASTANA. QazAqparat – Elordanyń Sanıtarlyq-epıdemıologııalyq baqylaý departamenti basshysynyń orynbasary Janna Pralıeva Astana qalasynyń turǵyndary men qonaqtaryna qyzylsha aýrýy týraly málimdedi, dep habarlaıdy QazAqparat.
Bıyl 13 maýsymdaǵy jaǵdaı boıynsha Astana qalasynda 34 bala qyzylshamen aýyrǵan. Olardyń ata-anasy QKP (qyzylshaǵa, qyzamyqqa jáne parotıtke qarsy aralas vaktsına) josparly egýden bas tartty.
Ókinishke qaraı, ata-analardyń vaktsınatsııadan bas tartýy balanyń densaýlyǵyna ǵana emes, aınalasyndaǵy jaqyn adamdarǵa da qaýip tóndiredi. Mysaly, qalanyń 2 mektepke deıingi balalar uıymynda qyzylshamen toptyq aýrý jaǵdaıy tirkelgen. Birinshi jaǵdaıda qyzylshamen aýyrǵan bala aýrýdy vaktsına almaǵan 8 balaǵa juqtyrady. Al ekinshi jaǵdaıda bala ózinen basqa vaktsına almaǵan 4 balaǵa juqtyrdy. Barlyq naýqas ata-anasynyń vaktsınatsııadan bas tartýyna baılanysty vaktsına almaǵan. Budan keıin balalar «qyzylshanyń tıptik túri» dıagnozymen aýrýhanaǵa tústi. Olardyń syrqaty kúrdeli dárejede ótken, ary qaraı órshý qaýpi bar.
Qazaqstandaǵy árbir bala vaktsına alýǵa quqyǵy bar. Memleket balany qorǵaý úshin qarjylaı qamtamasyz etedi jáne ata-analardyń vaktsınatsııadan bas tartýy balanyń quqyǵyn buzýmen teń.
Astana qalasynyń Sanıtarlyq-epıdemıologııalyq baqylaý departamenti qyzylshamen aýyrǵan balalardyń saý ujymda bolý quqyǵyn buzǵany úshin, josparly profılaktıkalyq ekpe almaǵan jáne ujymdyq ımmýnıtettiń shekti deńgeıine jetpegen mektepke deıingi balalar uıymdaryn ákimshilik jaýapkershilikke tartty.
«Mektepke deıingi uıymdarda ujymdyq ımmýnıtet toptaǵy balalardyń jalpy sanynyń keminde 90% deńgeıinde saqtalýy tıis. Josparly profılaktıkalyq ekpe almaǵan balalardy mektepke deıingi uıymdarǵa jiberý olardyń 10% - dan aspaıtyn toptardaǵy úlesi jasalǵan kezde ǵana júzege asyrylady.
Bizdiń elimizde kóptegen jyldar boıy Úndistanda shyǵarylǵan qyzylshaǵa, parotıtke jáne qyzamyqqa qarsy tiri vaktsına (PDA vaktsınasy) paıdalanylady. Vaktsına óz-ózin dáleldedi jáne bul vaktsınanyń tıimdiligi 95-97% jetedi. Sondyqtan ata-analardan josparly profılaktıkalyq ekpeden bas tartpaýyn suraımyz. Óıtkeni balalaryńyzdyń densaýlyǵy sizdiń qolyńyzda», – dedi Sanıtarlyq-epıdemıologııalyq baqylaý departamenti basshysynyń orynbasary.
Vaktsınatsııadan bas tartý juqpaly aýrýdan qatty zardap shegýge ákelýi múmkin. Mysaly, polıomıelıtpen aýyrǵan kezde paralıch damýy múmkin, qyzylsha soqyrlyq pen panentsefalıt týdyrýy múmkin (mıdyń zaqymdanýy saldarynan degradatsııa jáne ólim), uldarda parotıt – bedeýlikke, júkti áıelderde qyzamyq – uryqtyń týa bitti deformatsııasyna aparýy múmkin.
Aıta keteıik, bıyl Astana qalasynyń 58 turǵyny qyzylshamen aýyrǵan, onyń 48-i – bala. Onyń ishinde 9 bala medıtsınalyq sebepke baılanysty ekpe saldyrmasa, 34 nemese 71%-y ata-anasynyń bas tartý sebebinen qyzylshaǵa qarsy ekpe almaǵan.
