Astanada balalar arasynda JRVI-men syrqattaný 24%-ǵa ósti
ASTANA. KAZINFORM — 2025–2026 jyldardaǵy epıdemııalyq maýsymda Astanada 313 173 JRVI jaǵdaıy tirkeldi. Syrqattanǵandardyń 57,9%-y — 14 jasqa deıingi balalar.
Bul týraly Astana qalasynyń Sanıtarııalyq-epıdemıologııalyq baqylaý departamentiniń basshysy Aıgúl Shaǵaltaeva elordalyq Kommýnıkatsııalar qyzmetinde ótken brıfıngte málim etti.
Onyń aıtýynsha, 2025 jyldyń 40-aptasynan 2026 jyldyń 37-aptasyna deıin JRVI-men syrqattaný kórsetkishi 100 myń turǵynǵa shaqqanda 20 486,1 boldy. Bul ótken epıdemııalyq maýsymnyń sáıkes kezeńinen 1,1 ese joǵary.
14 jasqa deıingi balalar arasynda bul kórsetkish 100 myń turǵynǵa shaqqanda 41 963,1 boldy. Ótken maýsymmen salystyrǵanda balalar arasyndaǵy syrqattaný 24%-ǵa artqan.
— 10–16 qyrkúıek aralyǵynda Astanada 3 973 JRVI jaǵdaıy tirkeldi. Onyń 2 323-i 14 jasqa deıingi balalar arasynda anyqtaldy, — dedi Aıgúl Shaǵaltaeva.
Spıkerdiń sózinshe, 2025–2026 jyldardaǵy epıdemııalyq maýsymda tumaýǵa uqsas belgileri jáne aýyr jiti respıratorlyq ınfektsııasy bar naýqastardan 1 687 synama alynǵan. Zertteý nátıjesinde 250 jaǵdaıda tumaý, 9 jaǵdaıda COVID-19 anyqtaldy.
Sondaı-aq 725 synamadan tumaýǵa jatpaıtyn basqa vırýstar tabylǵan. Olardyń qatarynda rınovırýs, respıratorlyq-sıntsıtıaldy vırýs, adenovırýs, paragrıpp jáne metapnevmovırýs bar.
— Sońǵy eseptik aptada aýyr jiti respıratorlyq ınfektsııa belgilerimen aýrýhanaǵa túsken 18 jáne 19 jastaǵy eki adamnan A (H1N1)pdm09 tumaýy anyqtalǵan. Dıagnoz PTR zertteýi arqyly rastaldy, — dedi ol.
Buǵan deıin Almatyda JRVI juqtyrǵan 260-tan astam balanyń aýrýhanaǵa jatqyzylǵany habarlanǵan edi.
