Astanada balalar arasynda shaıbaly hokkeıden týrnır ótedi

ASTANA. KAZINFORM — 28-31 naýryz aralyǵynda elordada «SAMRUK BALA CUR» balalar men jasóspirimder komandalary arasynda shaıbaly hokkeıden týrnır ótedi.

Astana ákimdiginiń resmı saıtynyń habarlaýynsha, bul Qazaqstan óńirleriniń aýyldyq komandalary arasynda josparlanǵan iri hokkeı jarystarynyń úshinshi týrnıri. 

Atalǵan dodaǵa Shyǵys Qazaqstan, Qaraǵandy, Pavlodar, Atyraý, Aqtóbe oblystarynan, sondaı-aq Astana men Almatydan 24 komanda qatysady. 300-den astam bala, onyń ishinde Aqkól balalar úıiniń tárbıelenýshileri qatysady dep kútilip otyr.

Týrnır Astana qalasy ákimdiginiń jáne «Samuryq-Qazyna» AQ qaıyrymdylyq qyzmetiniń biryńǵaı operatory «Samruk Kazyna Trust» qorynyń qoldaýymen «Altyn Shaibaly» balalar hokkeıin damytý jobasy aıasynda ótip jatyr. Osylaısha, sporttyq is-shara Qazaqstandaǵy balalar hokkeıiniń tarıhyndaǵy eń iri týrnırlerdiń birine ǵana emes, sonymen qatar óńirlerdegi balalar úshin eń qoljetimdi týrnırlerdiń birine aınaldy.

Aıta keteıik, «SAMRUK BALA CUP» ótkizý aıasynda eki týrnır ótti, oǵan 600-ge jýyq jas sportshy qatysty.