Astanada balaǵa medıtsınalyq kómekti ýaqytyly kórsetpegeni úshin balabaqshanyń tárbıeshisi jumystan shyǵaryldy
ASTANA. 31 qazan. QazAqparat /Gúlmıra Alıakparova/ - Astanada balaǵa medıtsınalyq kómekti ýaqytyly kórsetpegeni úshin balabaqshanyń tárbıeshisi jumystan shyǵarylyp, mekeme basshylyǵyna sógiz jarııalandy. Al qala ákimi Imanǵalı Tasmaǵambetov, balanyń ata-anasyna balabaqsha ákimshiligin sotqa berýge keńes berdi.
Elorda ákiminiń jeke blogyna hat jazǵan Anastasııa Psıako, №14 «Aqbópe» balabaqshasyna baratyn kishi inisi 20 qazan kúni serýendeý kezinde qulap, moıyn omyrtqasyn zaqymdap alǵanyn aıtqan. Biraq jaraqattyń saldarynan kúni boıy moıny qısaıyp júrgen balaǵa tárbıeshileri mán bermegen jáne oǵan tıisti medıtsınalyq kómek kórsetilmegen. Ata-ana balanyń jaraqaty týraly keshkisin, balany úıine alyp keter kezde ǵana bildi.
«Biz úıde jedel járdemdi shaqyrdyq, ony №2 qalalyq aýrýhanaǵa, neırohırýrgııa bólimshesine jatqyzdy. Іnimmen anam jatyr, al oǵan aýrýhanada jatqany úshin jumys ornynan aqsha tólenbeıdi. Balabaqsha qyzmetkerlerine qaıda shaǵymdana alamyz jáne materıaldyq, moraldyq shyǵyndarymyzdy kim óteıdi?», - degen ol hatynda.
A.Psıakoǵa jaýap bergen qala ákimi, №14 «Aqbópe» balabaqshasynda qyrkúıek-qazan aıynda balalar aýyr jaraqat alǵan bir emes, eki oqıǵa oryn alǵanyn aıtty. Onyń ústine, balabaqsha qyzmetkerleri olarǵa medıtsınalyq tekserýdi júrgizbegendikten jáne tıisti kómekti kórsetpeýine baılanysty, atalǵan faktiler Astana qalasynyń bilim basqarmasy tártiptik keńesiniń qaraýyna usynyldy.
«Keshe, keńestiń sheshimimen tárbıeshi A.E.Baýkenova jumystan shyǵaryldy, balabaqsha meńgerýshisi mindetin atqarýshy S.L.Ishýtınaǵa sógis jarııalandy. Balabaqsha meńgerýshisi O.Jalmaǵanbetovaǵa ekinshi ret eskertý jasaldy. Ol oqıǵa bolǵan ýaqytta eńbek demalysynda bolǵandyqtan, 73 bap, 5 tarmaǵynyń 3 tarmaqshasyna sáıkes, oǵan ákimshilik óndirip alý jazasyn paıdalanýǵa bolmaıdy», - dep jaýap jazdy I.Tasmaǵambetov.
Onymen qosa, Astana basshysy, ata-ana kinálilerden shyǵyndy ótep alýǵa tolyǵymen quqyly ekendigin aıtty.
«Sizdiń otbasyńyz sotqa júginip, kinálilerden keltirilgen materıaldyq jáne moraldyq shyǵyndy ótep alýǵa quqyly. Men sizdiń anańyz Lıýdmıla Anatolevna Psıako №15 mektepte bastaýysh synyp muǵalimi ekenin bilemin. Osyny negizge alyp, istiń sotta qaralýynan bas tartylýy múmkin. Biraq eger sizder, sotqa júginýdi jón kórgen bolsańyzdar, anańyz da, onyń balalary da Astana qalasy bilim berý basqarmasy tarapynan qysym kórmeıtinin qadap aıtamyn. Bul úshin basqarma bastyǵy Bımendına Ásıma Temkeqyzy jeke jaýapty», - dep túıindedi ol.
