Astanada balabaqshalar arasyndaǵy «Juldyzdy jol» olımpıadasynyń jeńimpazdary anyqtaldy
ASTANA. 20 mamyr. QazAqparat - Astanada mektepke deıingi jastaǵy baldyrǵandar arasynda «Juldyzdy jol» VII qalalyq olımpıadasynyń ekinshi kezeńi ótti.
Oǵan qaladaǵy orys balabaqshalarynda tárbıelenýshi búldirshinder qatysty. Bul týraly «Astana daryny» Respýblıkalyq ǵylymı-tájirıbelik ortalyǵynan habarlady.
«Astana daryny» RǴTO uıymdastyrýshylarynyń aıtýynsha, atalǵan is-shara búldirshinderdi mektepke daıarlaýda mektepke deıingi bilim berýdiń reıtıngin kóterip, balalardyń boıynda shyǵarmashylyq qabiletti damytý, zııatkerlik qyzyǵýshylyqty arttyrý maqsatynda jetinshi ret uıymdastyrylýda.
«Qyzyl juldyz» - matematıka men logıkaǵa; «sary juldyz» - saýattylyqqa oqytýdy; «kógildir juldyz» - sóıleý tilin damytýǵa; «jasyl juldyz» - qorshaǵan ortamen tynysýǵa úıretedi. Árbir «juldyzdy» stansada baldyrǵandarǵa óz betinshe oryndaýǵa 3 tapsyrmadan berildi. Ár tapsyrma 5 ballmen baǵalandy. Balldyń sany boıynsha jeńimpazdar anyqtaldy.
Astana qalasynyń resmı saıtynyń habarlaýynsha, olımpıadaǵa elordanyń balabaqshalarynan 42 búldirshin qatysty. Bas júldeni №8 «Dýman» balabaqshasynyń tárbıelenýshisi ıelendi. Úsh bala birinshi oryn (№24 «Aınalaıyn», №32 «Baldáýren», №56 «Bereke» balabaqshalary) aldy. Tórt búldirshin II orynǵa ( №16 «Shaǵala», №33 «Altyn dán», №4 «Arýjan», №26 «Úmit» balabaqshalary) shyqsa, alty bala - III oryndy (№14 «Aq bota», №10 «Bóbek», №27 «Balaýsa», №8 «Dýman», №53 «Mereı», №6 «Kóktem» balabaqshalary) bólisti.
«Sonymen qatar, 7 maqtaý gramotasy tapsyryldy. Basshylar men ustazdary qatysqany týraly sertıfıkatqa ıe boldy. Júldege balalarǵa kitap, oıynshyqtar men táttiler berildi», - dep málimdeıdi uıymdastyrýshylar.
Eske salaıyq, qazaq tildi mektepke deıingi búldirshinder úshin «Juldyzdy jol» VII qalalyq olımpıadasy №8 «Dýman» balabaqshasy bazasynda ótken bolatyn. Oǵan 66 jas zerek tárbıelenýshi qatysty. Gran-prı № 51 «Altyn sandyq» balabaqshasyna buıyrsa, I oryndy eki bala ( № 8 «Dýman», №48 «Aq kógershin») bólisti. II oryndy - 6 bala («Qarlyǵash» QR PR, №19 «Balbóbek», №30 «Qaınar», №65 «Bal bala», №37 «Arman», №38 «Shattyq» balabaqshalary), III oryndy - 5 bala (№26 «Úmit», №22 «Álem», №35 «Ertegi», №62 «Nursáýle», №43 «Qyzǵaldaq» balabaqshalary) ıelendi.
