Astanada balabaqshaǵa joldama berý 1 shildede bastalady
ASTANA. KAZINFORM — Astanada 2026-2027 oqý jylyna arnalǵan mektepke deıingi uıymdarǵa balalardy qabyldaý 1 shildeden bastalady. Bıyl memlekettik jáne jekemenshik balabaqshalarda 2 jastan 5 jasqa deıingi balalarǵa shamamen 15 myń oryn bólingen.
Bul týraly qalalyq Ortalyq kommýnıkatsııalar qyzmetinde ótken baspasóz máslıhatynda Astana qalasy Bilim basqarmasy basshysynyń orynbasary Marjangúl Qaıyrbaeva aıtty.
Onyń aıtýynsha, balalardy balabaqshaǵa qabyldaý QR Oqý-aǵartý mınıstriniń 2024 jylǵy 30 jeltoqsandaǵy № 372 buıryǵymen bekitilgen tártipke saı júrgiziledi.
Spıker ata-analarǵa joldama berý bastalǵanǵa deıin qajetti daıyndyqty aldyn ala jasap qoıýdy usyndy.
— Eń aldymen ED24.kz mobıldi qosymshasyn júktep, júıege tirkelý qajet. Sondaı-aq «INDIGO — elektrondy balabaqsha» júıesindegi jeke kabınetke kirý múmkindigin tekserip, logın men qupııasózdiń jaramdy ekenine kóz jetkizgen jón. Budan bólek, ótinishtiń belsendi ekenin, muraǵatqa jiberilmegenin, merzimi ótip ketpegenin jáne «stop-lıst» mártebesinde turmaǵanyn tekserý mańyzdy, — dedi Marjangúl Qaıyrbaeva.
Onyń sózinshe, ata-analar aldyn ala birneshe memlekettik jáne jekemenshik balabaqshany tańdap qoıǵany durys.
Tolyq nusqaýlyqtar Astana qalasy Bilim basqarmasynyń resmı saıtyndaǵy «Qyzmeti → Mektepke deıingi tárbıe men oqytý» bóliminde jáne Indigo24.kz portalyndaǵy «Paıdaly aqparat» bóliminde jarııalanǵan.
Eske salaıyq, buǵan deıin Oqý-aǵartý mınıstrligi balabaqshaǵa kezekten tys oryn alyp berýdi usynatyn alaıaqtar kóbeıgenin eskertken bolatyn.
