Astanada balabaqshaǵa barǵysy kelmegen kishkentaı qyzdy urǵan týysyna ákimshilik is qozǵaldy

ASTANA. QazAqparat – Astanada polıtsııa balabaqshaǵa barǵysy kelmegen kishkentaı qyzdy urǵan týysyna ákimshilik is qozǵady, dep habarlaıdy QazAqparat Polisia.kz saıtyna silteme jasap.

Saıttaǵy derekterge qaraǵanda, áleýmettik jelini monıtorıngileý barysynda belgisiz boıjetkenniń kámeletke tolmaǵan qyzdy uryp jatqan beınejazbasy anyqtaldy.

Belgili bolǵanyndaı, 14 tamyz kúni tańǵy ýaqytta 5 jasar qyz balabaqshaǵa barǵysy kelmegen. 17 jastaǵy týysy onyń bul áreketine narazylyq bildirgen.

Boıjetkenge qatysty ÁQBtK-niń 73-2-baby 1-bóligi «Uryp-soǵý» boıynsha ákimshilik is qozǵaldy.

«Qyz balanyń zańdy ókilderi bolǵan oqıǵany ári qaraı talqylaýdan bas tartty. Olarǵa balalar psıhologymen jumys usynyldy»,-delingen habarlamada.

Áleýmettik jeli qoldanýshylardyń oqıǵa elordadaǵy «Flamıngo» turǵyn úı kesheniniń janynda bolaǵanyn jazǵan.

Osy oqıǵaǵa oraı, Bala quqyqtary jónindegi ýákil Dınara Zákıeva óziniń Facebook paraqshasynda post jarııalady.

Onyń aıtýynsha, 17 jasar qyz aǵasyna qonaqqa kelgen. Tańerteń oǵan balany balabaqshaǵa aparyp kelýdi tapsyrǵan. Kishkentaı qyz balabaqshaǵa barǵysy kelmeı jylaıdy, sodan boıjetken jıenine qol kóteredi.

«Bul fakti boıynsha boıjetkenge ÁQBtK-niń 73-2-baby 1-bóligi boıynsha ákimshilik hattama jasalyp, ákimshilik quqyq buzýshylyq boıynsha mamandandyrylǵan aýdanaralyq ákimshilik sotqa jiberildi.

Іs boıynsha Astana qalasynyń ákimdigimen baılanystamyn.

«Quqyq» QQ búkil otbasyn psıhologııalyq súıemeldeýge alady (alǵashqy qabyldaý osy sársenbi kúni ótedi)»,-dep jazdy Dınara Zákıeva.