Astanada balabaqshadaǵy sábılerdiń patrıottyq sezimin ushtaý máselesi talqylandy
ASTANA. QazAqparat - Elordadaǵy №29 «Aq qaıyń» balabaqshasynda «Patrıottyq, adamgershilik, tárbıe - bilim berý úrdisinde yqpaldastyrýdyń tıimdi joldary» atty qalalyq semınar ótti, dep habarlaıdy QazAqparat tilshisi.
«Ózderińiz biletindeı, osy oqý jylynan bastap, búkil bilim salasynda klaster boıynsha jumys bastalady. Demek, ár klaster óz baǵyttarynda jumys júrgizetin bolady. Bizdiń klasterimiz - «patrıottyq, adamgershilik, tárbıe» baǵyty. Osy semınardaǵy tárbıeshiler, ádiskerler, meńgerýshiler - bizdiń seriktes balabaqshalardan kelip otyr. Biz óz klasterimiz boıynsha birshama is tyndyrdyq. Ár seriktes balabaqsha birneshe semınar, ashyq sabaqtar, basqa formada da kóptegen is-sharalardy ótkizdi. Ózimiz ótkizgen birneshe semınarda «Órleýden», bilim basqarmasynan, «Rýhanı jańǵyrý» bóliminen lektorlar qatysyp, osy baǵytty keńinen talqyladyq», - dedi semınardyń ashylýynda №29 «Aq qaıyń» balabaqshasynyń meńgerýshisi Láılá Rahymjanova.
Onyń aıtýynsha, búgingi semınar - semınar-praktıkým dep atalady. Onyń ereksheligi - seriktes balabaqshalar (№9, №6, №58, №24) óz búldirshinderin №29 «Aq qaıyń» balabaqshasyna alyp kelip, sheberlik synybyna birge qatystyrylady.
«Óıtkeni, klasterdiń eń mańyzdy maqsaty - seriktes balabaqshalarmen tyǵyz baılanys ornatý. Bul rette ádiskerler men meńgerýshilerdiń bir-birimen tájirıbe almasyp, keńese jumys atqarýdyń mańyzy óte zor», - deıdi Láılá Rahymjanova.
Semınar eki bólim boıynsha ótti. Alǵashqysy plenarlyq mazmunda uıymdastyrylyp, patrıottyq tárbıeni mektepke deıingi jastan bastaý joldary, mektepke deıingi mekemede patrıottyq adamgershilik tárbıe júıesinde atqarylǵan jumystar talqylandy. Bul taqyryptarda Nazarbaev zııatkerlik mektebiniń tárbıeshisi Maǵfýza Janpeıisova balany jasynan patrıottyq sezimde jetildirý jaǵynan óziniń oı-paıymymen, pikirimen bólisti. Sonymen birge, №29 «Aq qaıyń» balabaqshasymen seriktes balabaqshalardyń meńgerýshileri osy taqyrypta oılaryn ortaǵa saldy.
Al semınardyń «is-tájirıbelik» dep atalatyn ekinshi bóliminde atalmysh balabaqshanyń «Kúnshýaq» tobymen «Biz Otanymyzdyń ulanymyz» sheberlik synyby uıymdastyryldy. Sonymen qatar, №6«Kóktem», №9 «Nurshashý», №24 «Aınalaıyn», №58 «Órken» balabaqshalarynyń tárbıelenýshileri sóz sóıledi. Іs-shara balabaqshanyń mýzyka jetekshisi A.Maǵzumovanyń «Týǵan jer» kompozıtsııasymen aıaqtaldy.
