Astanada balabaqsha tárbıelenýshisi menıngıt juqtyrdy degen kúdikpen aýrýhanaǵa jatqyzyldy
ASTANA. QazAqparat - «Baldaýren» №32 balabaqshasynyń tárbıelenýshisi «irińdi menıngıt» juqtyrdy degen kúdikpen aýrýhanaǵa jatqyzyldy. Bul týraly «QazAqparat» HAA resmı saýalyna QR Ultyq ekonomıka mınıstrligi Tutynýshylardyń quqyqtaryn qorǵaý komıtetiniń Astana qalasy tutynýshylardyń quqyqtaryn qorǵaý departamentinen habarlady.
«№32 balabaqshada 28 mamyrda «irińdi menıngıt» juqtyrǵan degen kúdikpen bir jaǵdaı tirkeldi. Búginde naýqas statsıonarlyq em qabyldaýda. Naqty dıagnoz anyqtalǵan joq, klınıkalyq taldaýlar ázirge daıyn emes», - delingen habarlamada. «Infektsııalyq aýrýdyń taralýyna jol bermeý maqsatynda balalar mekemesiniń basshysyna Astana qalalyq Bas memlekettik sanıtarlyq dárigeriniń sanıtarlyq-epıdemıologııalyq sharalar júrgizý, topta 10 kúnge shekteý sharalaryn (topqa jańadan bala qabyldaýǵa, toptan-topqa aýystyrýǵa, kópshilik oryndaryna barýǵa jáne t.b.) engizý týraly qaýlysy berildi», - dep habarlady vedomstvodan. Sondaı-aq 26 bala men 7 qyzmet kórsetetin personalǵa menıngokokk ınfektsııasyn anyqtaý maqsatynda bakterıologııalyq zertteý júrgizildi, onyń nátıjesi boıynsha ınfektsııa tasymaldaǵysh anyqtalǵan joq.
