Astanada balabaqsha pedagogtaryn oqytatyn fakýltet ashylady
ASTANA. QazAqparat - L.N.Gýmılev atyndaǵy Eýrazııa ulttyq ýnıversıtetinen «Mektepke deıingi pedagogıka» fakýlteti ashylady. Bul týraly búgin Astana ustazdarynyń tamyz keńesi kezinde qalalyq bilim berý basqarmasynyń basshysy Elmıra Sýhanberdıeva málim etti.
«Qaladaǵy mektepaldy bilim berý júıesinde qalyptasyp otyrǵan jaǵdaıdy eskersek, mektepke deıingi bilim beretin pedagogtardyń aldynda turǵan mindet -balabaqshadan shyqqan balalardyń mektepke daıyn kelýin qamtý. ıAǵnı, balanyń mekteptegi úlgerimi balabaqshada alǵan bilimi men tárbıesine tikeleı qatysty degen sóz. Sondyqtan, balabaqsha pedagogtarynyń aldynda turǵan mindet kóp. Buryn L.N.Lýmılev atyndaǵy EUÝ-de «Áleýmettik ǵylymdar fakýlteti» osy mamandyqqa oqytty da, eki ret túlek shyǵarǵan soń, suranystyń joqtyǵynan mamandyqty jaýyp tastady. Biraq, qazir bilimdi ári jańasha oılaıtyn maman tabý óte qıyn»,-deı kele bilim basqarmasynyń basshysy suranysqa baılanysty osy mamandyqqa oqytatyn fakýltet ashylatynyn jetkizdi.
«Bıyl jańa oqý jylynda Eýrazııa Ulttyq ýnıversıtetiniń bazasynda «Mektepke deıingi pedagogıka» fakýlteti ashylyp, balabaqshalardyń tárbıeshilerin oqyta bastaıdy»,-dep atap ótti E.Sýhanberdıeva.
