Astanada balabaqsha kezeginde turǵandar sany 100 myńǵa jetip jyǵylady - A.Sárinjipov
ASTANA. 16 jeltoqsan. QazAqparat - Astanada balabaqsha kezeginde turǵandar sany 100 myńǵa jetip jyǵylady. Bul týraly «KTK» telearnasynyń «Halyq qyzmetshisi» baǵdarlamasynda qonaq bolǵan QR Bilim jáne ǵylym mınıstri Aslan Sárinjipov aıtty.
Mınıstrdiń atap ótýinshe, Almaty men Astana qalalarynda jáne Almaty men Ońtústik Qazaqstan oblystarynda balabaqsha tapshylyǵy kúrdeli problemalardyń birine aınalyp otyr. Al bul problemany memlekettik tapsyrys jáne jeke ınvestıtsııa arqyly sheshý qıyndyq týyndatýda.
«Astanada balabaqsha kezeginde 100 myń adam tur. Balalardyń qamtylýy 60 paıyzdan tómen, bul ortasha respýblıkalyq kórsetkishten de kem. Biz Úkimet, qala ákimdigi deńgeıinde kezekti qysqartý úshin qandaıda bir qosymsha shara qabyldaýymyz qajet», - dedi ol.
Sonymen qatar A.Sárinjipovtiń aıtýynsha, Memleket basshysy bekitken memlekettik baǵdarlamaǵa sáıkes elimizde balalardy mektepke deıingi tárbıemen qamtý kórsetkishi 2020 jylǵa qaraı 100 paıyzdyq kórsetkishke jetýi tıis.
«Bul shamamen 2016 jylǵa qaraı bizdiń 80 paıyzdyq qamtý kórsetkishine qol jetkizýimiz qajettigin kórsetedi. Qazirgi ýaqytta respýblıka boıynsha bul kórsetkish ortasha eseppen 72 paıyzdy quraıdy. Bizderge qosymsha qoldaý sharalary qajet. Budan bólek biz bul máseleni Májilis depýtattarymen qarastyryp, Úkimetpen qosymsha sharalardy daıyndaýymyz qajet», - dedi mınıstr.
