Astanada «Bala Turkvizyon» halyqaralyq baıqaýyna irikteý júrip jatyr - VIDEO
ASTANA. QazAqparat - Astanada «Bala Turkvizyon» halyqaralyq balalar án baıqaýyna irikteý júrýde.
«Bala Turkvizyon» túrkitildes halyqtar arasynda ótkiziletin alǵashqy balalarǵa arnalǵan halyqaralyq baıqaý bolmaq. Baıqaýdyń ulttyq irikteýin ótkizýge Qazaqstan Respýblıkasynyń Tuńǵysh Prezıdenti Elbasynyń qoldaýymen Álııa Nazarbaevanyń «Jandaný álemi» jeke qory demeýshilik etýde. «BALA Turkvizyon-2015» baıqaýyna 8 ben 13 jas aralyǵyndaǵy balalar qatysady. Astanadaǵy baıqaýda Qaırat Baekenov, Marjan Arapbaeva men Gúlsim Myrzabekova syndy tanymal ánshiler qazylyq etedi.
Kez kelgen daryndy bala Qazaqstandaǵy «Bala Turkvizyon» baıqaýynyń qatysýshysy bola alady.
Óńirlik irikteý nátıjeleri boıynsha 16 qatysýshy anyqtalǵan soń olar Marjan Arapbaeva, Rınat Maltsagov, Dastan Orazbekov, Kámshat Joldybaeva jáne taǵy basqa ánshilerdiń qol astyna ótedi. Sóıtip, ártisterdiń árqaısysy jobaǵa qatysatyn bir-bir konkýrsanttyń prodıýserine aınalady.
Jeńimpaz kúzde túrki áleminiń astanasy Mary (Túrikmenstan) qalasynda ótetin «Bala Turkvizyon» Halyqaralyq balalar baıqaýynyń Grand-fınalyna joldama alady.
«Ulttyq irikteýdiń jeńimpazy jeltoqsanda Stambulda ótetin baıqaýdyń Grand-fınalyna joldama alady. Onda 21 eldiń óreni óz ónerlerin ortaǵa salady. Grand-fınaldyń aýdıtorııasy shamamen 300 mln. adamǵa jýyqtaıdy. Bizdiń jeńimpazdy álemniń kóptegen halqy kóredi», - deıdi «Jandaný álemi» qorynyń dırektory Murat Isahanov.
Aıta ketý kerek, aımaqtyq baıqaýlardyń jeńimpazdary «Juldyzdy úıge» túsedi. Onda tanymal hareograftar, mýzykanttar men rejısserler balalarǵa eki apta boıy kásibı ónerdiń qyr-syryn úıretedi.
Ulttyq irikteýdiń fınaly 16-17 qyrkúıekte Astanada ótedi. Oǵan deıin árbir óńirdiń jeńimpazdaryna kompozıtorlar qazaqsha án jazyp berýi tıis. Eń kásibı qazylar olardyń ishinen úzdik oryndaýshyny tańdaıdy.
