Astanada bala tárbıesine kóńil bólmegen 9 ata-ana jaýapkershilikke tartyldy
ASTANA. QazAqparat - Elordalyq ІІD ıývenaldy polıtsııa qyzmetkerleri «Mektepke jol» qaıyrymdylyq aktsııasynyń aıasynda «Balalar saıajaıda» atty jedel aldyn alý is-sharasyn ótkizdi, dep habarlaıdy Astana qalasynyń ІІD-niń baspasóz qyzmetinen.
Іs-shara sheńberinde balalar panasyzdyǵynyń aldyn alý boıynsha oqýmen qamtylmaǵan mektep jasyndaǵy balalardy anyqtaý, aldaǵy ýaqytta jaǵdaılary tómen jáne berekesiz otbasylarǵa áleýmettik kómek kórsetý maqsatynda jumystar júrgizildi.
Reıd júrgizý barysynda polıtsııa qyzmetkerleri bilim berý organdarynyń ókilderimen birlese 600 saıajaı ýchaskelerin aralap,tekserdi. Nátıjesinde aýmaqtyq ІІB-na 13 jasóspirim jetkizilip, sonyń ishinde 8-i kámeletke tolmaǵandardy beıimdeý ortalyǵyna ornalastyryldy. Balalardy tárbıeleýdegi mindetterdi oryndamaǵany úshin 9 ata-ana ákimshilik jaýapkershilikke tartyldy. Jedel aldyn alý is-sharasynyń barysynda saıajaılyq qoǵamynyń aýmaǵynyń birinen áleýmettik jaǵdaıy tómen otbasynyń asyraýyndaǵy kámelettik jasqa tolmaǵan 3 bala anyqtaldy, ishki ister organdaryna profılaktıkalyq esepke turǵyzý úshin 6 berekesiz otbasy jetkizildi. Odan basqa, oqýmen qamtylmaǵan mektep jasyndaǵy 6 bala anyqtaldy. Aldaǵy ýaqytta anyqtalǵan faktiler jónindegi aqparat Bilim basqarmasyna atalmysh otbasylarǵa kómek kórsetý úshin jiberiledi.
