Astanada bala tárbıesinde salǵyrttyq tanytqan ata-analarǵa qatysty 259 is qaralǵan
ASTANA. QazAqparat - Astana qalasy Kámelettik jasqa tolmaǵandar isteri jónindegi mamandandyrylǵan aýdanaralyq sotynda sot, ІІD qyzmetkerleri jáne prokýratýra ókilderiniń qatysýymen Astana qalasy ІІD qyzmetkerlerine arnalǵan ákimshilik zańnamanyń normalaryn qoldaný tájirıbesine qatysty dóńgelek ústel ótkizildi.
Qalalyq sottyń baspasóz qyzmetiniń habarlaýynsha, dóńgelek ústel aıasynda 2016 jyldyń 9 aıynda Astana qalasy Kámelettik jasqa tolmaǵandar isteri jónindegi mamandandyrylǵan aýdanaralyq sotynda tirkelgen jáne qarastyrylǵan ákimshilik zańnamalar júıesi men quqyq buzýshylyq baptary boıynsha ister talqylandy.
Semınarda Astana qalalyq sotynyń sýdıasy Qazıma Aıtqalıeva birshama sot isteri boıynsha málimetterdi keltirdi. Atalǵan ýaqyt aralyǵynda sotta qaralǵan isterdiń statıstıkalyq málimetterin alyp qarasaq, ata-ananyń nemese basqa da zańdy ókilderdiń kámeletke tolmaǵan balalardy tárbıeleý men oqytý jónindegi mindetterdi oryndamaýyna qatysty 259 is qaralǵan, onyń ishinde 207 is boıynsha tulǵalar ákimshilik jaýapkershilikke tartylsa, 52 tulǵaǵa qatysty is óndirispen toqtatylǵan. Kámeletke tolmaǵandarǵa erotıkalyq mazmundaǵy basylymdar, kıno- nemese beınematerıaldardy, beınelerdi nemese ózge de zattardy ne materıaldardy satý boıynsha 2 is qaralyp, 2 tulǵa jaýapkershilikke tartylǵan.
Kámeletke tolmaǵan adam jasaǵan usaq buzaqylyqqa qatysty 101 is qaralyp, 92 adam ákimshilik jaýapkershilikke tartyldy. Kámeletke tolmaǵandardyń túngi ýaqytta zańdy ókilderiniń erip júrýinsiz oıyn-saýyq mekemelerinde bolýy boıynsha ister jıi qaralady. 9 aıda 89 is qaralyp, 78 tulǵaǵa qatysty ákimshilik quqyq buzýshylyq týraly hattamalar toltyrylǵan.
Ata - analardyń bala tárbıesine salǵyrt qaraýynyń nátıjesinde beleń alǵan qylmystyq ister men ákimshilik quqyq buzýshylyqtar sanyn azaıtý maqsatynda birqatar profılaktıkalyq jumystarynyń júrgizilý qajettiligi qyzý talqylandy.
Shara barysynda sýdıa keıbir isterge qatysty mysaldar keltirip, Ákimshilik quqyq buzýshylyq týraly kodeks normalary talaptarynyń qatań saqtalyp, quqyqtyq qatelikter jibermeý masatynda ákimshilik quqyq týraly zańnamaǵa engizilgen ózgertýler men tolyqtyrýlardy únemi qadaǵalap otyrý jaıly usynystardy tilge tıek etti.
Shara aıasynda ákimshilik ónidiriske qatysýshylardyń quqyqtary men bostandyqtarynyń qadaǵalaýdy qamtamasyz etý baǵytynda alda atqarylatyn jumys barysy talqylandy.
