Astanada BAQ qyzmetkerleri kúnine oraı jýrnalıster arasynda baıqaý jarııalandy

ASTANA. KAZINFORM – Astanada BAQ qyzmetkerleriniń kúnine oraı buqaralyq aqparat quraldary men áleýmettik jelilerde elordanyń damýy týraly úzdik jarııalanymdar, reportajdar, sıýjetter baıqaýy jarııalandy, dep habarlaıdy qala ákimdiginiń resmı saıty.

Baıqaýǵa Qazaqstannyń barlyq kez kelgen jýrnalısi qatysa alady. Konkýrsty Astana qalasynyń Kommýnıkatsııalar qyzmeti Іshki saıasat basqarmasynyń qoldaýymen uıymdastyrady.

Baıqaýǵa 2024 jylǵy 1 maýsym men 2025 jylǵy 16 maýsym aralyǵynda memlekettik nemese orys tilinde jarııalanǵan, efırge shyqqan materıaldar qabyldanady. Qatysýshy tek bir nomınatsııa boıynsha bir ǵana materıal usyna alady.

Baıqaý kelesi nomınatsııalar boıynsha ótkiziledi:

1. «Úzdik jýrnalıst-sarapshy» – Assambleıanyń 30 jyldyǵy aıasynda elordadaǵy Qazaqstan halqy assambleıasynyń qyzmeti týraly baspa basylymdarda jarııalanǵan analıtıkalyq materıaldar; 
2. «Úzdik sholýshy» – ınternet-basylymdarda jarııalanǵan, Astana qalasynyń áleýmettik-ekonomıkalyq damýyn sıpattaıtyn materıaldar, sondaı-aq zańdylyq, qoǵamdyq tártip, vandalızm, nashaqorlyq, qumar oıynǵa táýeldilik jáne elordadaǵy ózge de áleýmettik túıtkilderge qatysty máselelerdi qamtıtyn jarııalanymdar qarastyrylady;
3. «Úzdik radıoreportaj» – Astana týraly radıosıýjetter;
4. «Úzdik telesıýjet» – bul atalym qalanyń tynys-tirshiligine arnalǵan materıaldardy qamtıdy. Atap aıtqanda, ýrbanıstıka máseleleri, qoǵamdyq tártipti saqtaý, sondaı-aq vandalızm, nashaqorlyq, qumar oıynǵa táýeldilik jáne qalalyq ortadaǵy ózge de keleńsiz kórinisterdiń aldyn alý men olardy boldyrmaý taqyryptary qozǵalǵan telesıýjetter qarastyrylady.
5. «Úzdik mobılograf» – megapolıs ómirinen aerotúsirilim qoldanylǵan beınerolıkter;
6. «Úzdik fotoreportaj» – Astanadaǵy «Taza Qazaqstan» ekologııalyq bastamasynyń júzege asyrylýyn beıneleıtin fotosýretter;
7. «Jumysshy mamandyqtar jyly» arnaıy nomınatsııasy – áleýmettik jelilerde jarııalanǵan úzdik materıaldar.

Facebook, Instagram jáne TikTok jelilerindegi tanymal toptar men pablıkter qatysý úshin ótinim bere alady.

Nomınatsııalar boıynsha jeńimpazdardy belgili jýrnalıster, medıa sarapshylar jáne salanyń bedeldi ókilderinen quralǵan konkýrstyq komıssııa anyqtaıdy.

Eń úzdik jumystar aqshalaı sertıfıkattarmen marapattalady. Birinshi oryn ıegerine – 1 000 000 teńge, ekinshi orynǵa – 700 000 teńge, úshinshi orynǵa – 500 000 teńge kóleminde júlde taǵaıyndalady. 

Ótinimder 2025 jylǵy 16 maýsymǵa deıin qabyldanady. Elektrondy poshta: [e-mail]; Uıymdastyrý komıtetiniń baılanys nómiri: 8 778 603 90 94;

Sonymen qatar BAQ ókilderi arasynda «Taza Qazaqstan – Taza Astana» baıqaýy jarııalandy.