Astanada BaiQymyz-2026 halyqaralyq qymyz festıvali ótedi
ASTANA. KAZINFORM – Elordada 11-12 shilde kúnderi qazaqtyń ulttyq dástúri, mádenıeti men taǵamdaryn dáripteıtin BaiQymyz-2026 halyqaralyq gastronomııalyq festıvali ótedi, dep habarlaıdy Astana ákimdiginiń resmı saıty.
Іs-shara eki kún boıy saǵat 09:00-den 22:00-ge deıin jalǵasady. Festıval baǵdarlamasyna gastronomııalyq alańdar, ulttyq sport túrleri, halyq oıyndary, kontsertter, kórmeler jáne otbasylyq demalysqa arnalǵan túrli is-sharalar engizilgen.
Festıvaldiń basty oqıǵalarynyń biri – qymyz baıqaýy. Onda úzdik óndirýshiler óz ónimderin tanystyryp, kelýshiler ulttyq sýsyndy daıyndaý dástúrimen tanysa alady.
– Qonaqtarǵa ulttyq taǵamdardy ázirleý boıynsha aspazdyq shoýlar men sheberlik sabaqtary, sondaı-aq «Úzdik qazy» baıqaýy usynylady, – delingen habarlamada.
Ulttyq sport túrlerin unatatyndar kókpar, báıge, aýdaryspaq, dástúrli sadaq atý jarystaryn tamashalaı alady. Sonymen qatar «Qoı kóterý», «Jilik syndyrý», at ústindegi kvıddıch jáne basqa da ulttyq oıyndar uıymdastyrylady.
Festıvaldiń basty sahnasynda eki kún boıy belgili qazaqstandyq ónerpazdar men shyǵarmashylyq ujymdar óner kórsetedi.
Uıymdastyrýshylar turǵyndar men qala qonaqtaryna festıval ótetin jerge qoǵamdyq kólikpen kelýge keńes beredi. Osyǵan baılanysty 7-13 shilde aralyǵynda №18, №37 jáne №303 avtobýs baǵyttarynyń qozǵalys syzbasy ýaqytsha ózgeredi. Bul kúnderi avtobýstar «Qazanat» ıppodromyna deıin qatynaıdy.
Festıval bıletterin Ticketon platformasy arqyly satyp alýǵa bolady. Bir kúndik nemese eki kúnge arnalǵan bıletter qarastyrylǵan. Zeınetkerler men 16 jasqa deıingi balalar úshin kirý tegin.
Aıta keteıik, buǵan deıin Astanada kóne dástúr — Qymyzmuryndyq toılanatyny habarlandy.
