Astanada «BaiQymyz-2026» halyqaralyq gastrofestıvali ótedi
ASTANA.KAZINFORM — Astana qalasynda «Qazanat» ıppodromynda 11-12 shilde kúnderi qazaqtyń asyl sýsyny qymyzǵa arnalǵan «BaiQymyz — baptalǵan qymyz ulttyq taǵamdar gastrofestıvali» atty halyqaralyq iri kólemdegi mədenı-agrarlyq is-shara ótedi. Bul týraly Astana qalasynyń ákimdigi málim etti.
Atalǵan festıval halqymyzdyń dəstúrli taǵam mədenıetin, onyń ishinde qymyz óndirý dəstúrin jańǵyrtý men halyqaralyq deńgeıge ilgeriletýge baǵyttalǵan. Іs-sharaǵa 60-70 myń adam keledi dep josparlanyp otyr.
Elimizdiń ər óńirinen jəne Qyrǵyz memleketi men Reseı federatsııasynan (Saha) 60-qa jýyq qymyz óndirýshi qatysady. Festıval Oktoberfest sııaqty halyqaralyq úlgidegi mədenı-agrarlyq brendke aınalýy kózdelip otyr. Qonaqtar eki kún boıy qymyzdyń túr-túrinen dəm tatyp, jylqy tuqymdary tanystyrylatyn kórmeni tamashalap, etno-mədenı baǵdarlamalarǵa qatysa alady.
— Festıvaldiń basty ereksheligi — halyqaralyq deńgeıdegi «Eń úzdik qymyz» baıqaýy. Jalpy júlde qory 45 mıllıon teńgeni quraıdy. Saıys aıasynda «BaiQymyz-2026», «Em qymyz» jəne «Halyq tańdaýy» atalymdary boıynsha jeńimpazdar anyqtalady. Baıqaý jeńimpazdaryna qarjylaı syılyqtar, arnaıy kýboktar men baǵaly marapattar tabystalady. Al bas júlde alǵan jeńimpazǵa avtokólik syıǵa beriledi, — delingen habarlamada.
Uıymdastyrýshylardyń məlimetinshe festıval aıasynda qazaqtyń jaby, muǵaljar, qostanaı, kóshim jəne adaı sekildi ulttyq jylqy tuqymdarynyń kórmesi uıymdastyrylady. Sonymen qatar asyl tuqymdy jylqylar aýktsıony ótkizilip, 30-ǵa jýyq jylqy satylymǵa shyǵarylady. Qonaqtarǵa ulttyq qolóner sheberleriniń kórmesi usynylady. Onda zergerlik buıymdar, bylǵary jəne aǵashtan jasalǵan týyndylar, sondaı-aq at-əbzelderi men jylqy mədenıetine qatysty buıymdar tanystyrylady.
— Festıval aıasynda Qazaqstannyń tanymal qylqalam sheberleriniń shyǵarmashylyq kórmesi uıymdastyrylady. Kórmege Jumaqyn Qaırambaev, Dosbol Qasymov, Sembiǵalı Smaǵulov, Geımran Baımuhanov, Dəýren Qasteev syndy belgili sýretshiler qatysyp, óz týyndylaryn kópshilik nazaryna usynady. Sonymen qatar kórme barysynda óner týyndylarynyń arnaıy jabyq formattaǵy aýktsıony ótkizilip, kelýshiler qazaqstandyq sýretshilerdiń biregeı shyǵarmalarymen tanysýǵa múmkindik alady, — dep habarlady ákimdikten.
Mədenı baǵdarlama aıasynda Qazaqstan estradasynyń tanymal juldyzdary óner kórsetedi. Kórermender Sadraddin, Qazybek Quraıysh, Ǵazızhan Shekerbek, «Turan» etno-folklorlyq ansambli, Jubanysh Jeksen, Qaırat Baekenov pen «Format» toby, Qydyrəli Bolmanov, Qaraqat Əbildına jəne basqa da óner ıeleriniń kontsertin tamashalaı alady.
Sonymen qatar festıvalde kókpar, aýdaryspaq, qyz qýý, erler jəne əıelder bəıgesi, tazylar jarysy, balalar Rodeo-sy, shógen (polo), at ústindegi kvıddıch, konkýr jəne basqa da ulttyq əri zamanaýı sport túrlerinen jarystar uıymdastyrylady.
Ulttyq rýhanııatty nasıhattaý maqsatynda arnaıy kitap kórmesi de ótedi. Kórmede jylqy sharýashylyǵy, qymyz óndirý, ulttyq taǵamdar, kóshpendiler órkenıeti, etnografııa jəne balalar ədebıeti baǵytyndaǵy kitaptar usynylady. «BaiQymyz-2026» gastrofestıvali — qymyz mədenıetin halyqaralyq deńgeıde dəripteýge, ulttyq qundylyqtardy nasıhattaýǵa, jylqy sharýashylyǵyn damytýǵa jəne Qazaqstannyń týrıstik əleýetin arttyrýǵa baǵyttalǵan biregeı joba.
Eske sala keteıik, byltyr elordada «BaiQymyz» ulttyq taǵamdar gastrofestıvali shilde aıynda ótken bolatyn.
