Astanada «BAIQONYR RUN» jeńil atletıkalyq jarysy ótti
ASTANA. KAZINFORM – Elordada «Astana – esirtkisiz qala» aktsııasy aıasynda «BAIQONYR RUN» jeńil atletıkalyq jarysy uıymdastyryldy, dep habarlaıdy Astana qalasy ákimdiginiń resmı saıty.
Jarys qalalyq ákimdik pen sporttyq-buqaralyq is-sharalardy ótkizý dırektsııasynyń birlesýimen ótkizildi. Qatysýshylar «Alataý» sport kesheni mańyndaǵy aýmaqta 4 shaqyrym qashyqtyqqa júgirdi.
Sporttyq sharaǵa 500-den astam adam qatysty, olardyń qatarynda 10 jastan asqan balalar men eresekter boldy.
Qatysýshylarǵa estelik medaldar tabystaldy. Jarys aıaqtalǵannan keıin 10 velosıped utysqa tigildi.
– Jarystyń maqsaty – Astanada ótip jatqan esirtkige qarsy aktsııa aıasynda ásirese jastar arasynda salaýatty ómir saltyn qalyptastyrýdy nasıhattaý. Biz olardyń shylym shegý jáne zııandy zattardy qoldaný sekildi teris ádetterden aýlaq bolýyna, sportqa bet burýyna jaǵdaı jasaǵymyz keledi. Ókinishke qaraı, búginde jastar arasynda mundaı zııandy ádetter jıi kezdesip jatady, al biz buǵan qarsy turýymyz kerek, - dedi elordadaǵy sporttyq-buqaralyq is-sharalardy ótkizý dırektsııasy basshysynyń orynbasary Erjigit Óserbaı.
«Astana – esirtkisiz qala» aktsııasy jyl basynda bastaý alǵan. Osy ýaqytqa deıin onyń aıasynda 300-den astam is-shara ótkizildi. Tek ótken aptada ǵana jappaı velosherý uıymdastyryldy. Jyl sońyna deıin Astana qalasy Polıtsııa departamentiniń esirtki qylmystaryna qarsy is-qımyl basqarmasymen birlesip, taǵy 100-ge jýyq is-shara ótkizý josparlanyp otyr.
Buǵan deıin 4 myńnan asa astanalyq BI qaıyrymdylyq marafonyna qatysqanyn jazǵan edi.