Astanada baǵanasynyń túsi ózgeretin baǵdarsham paıda boldy

ASTANA. QazAqparat - Jaıaý júrginshilerdiń qaýipsizdigin saqtaýǵa baǵyttalǵan Smart-ınfraqurylymnyń bir jańashyldyǵy elordada pılottyq rejimdi snaqtan ótkizilýde, dep habarlaıdy QazAqparat «Astana Innovations» kompanııasynyń Feısbýktegi paraqshasyna silteme jasap. 

Respýblıka dańǵylynyń boıynsha «Esil» saýda úıine qarama-qarsy ornatylǵan baǵdarsham pılottyq rejimde jańǵyrtyldy. Endi onyń baǵanasy da baǵdarshamnyń janyp turǵan túsine oraı jaryq beriledi. 

Bul - «Aqyldy qala» standartyn qalyptastyrý úshin qala ákimdiginiń qyzmetiniń bir bóligi bolyp tabylatyn, qaýipsiz orta qalyptastyrýǵa baǵyttalǵan bastama.  Osyndaı baǵdarsham Kıevte, Dýbaıda, Máskeýde jáne álemdiegi iri qalalarda qoldanylyp keledi.
«Qazir elorda basshylyǵy qalada jol apatyn azaıtý, kóshelerdi qaýipsiz etýdi júktep otyr. Sonyń ishinde jaıaý júrginshi ótpeleri basty nazarda.
Aldaǵy ýaqytta júrgizýshi alystan kózge túsetin ásirese ala kóleńke ýaqytta anyq baıqalatyn baǵdarshamdy basqa da shamdardyń jaryǵymen shatastyrmaıdy. Óıtkeni baǵdarshamnyń janyp turǵan túsi ol ilingen baǵananyń boıynda tolyq qaıtalanady. 
Bul júıe baǵdarshamnyń janyp turǵan túsin dybystap turatyn kómekshi quralmen jabdyqtalǵan, ol kózi kórmeıtin jandarǵa kómekke keledi.
Bul tehnologııa «aqyldy qalanyń» bir kórinisi, ol estetıkalyq máni bar jáne onyń qaladaǵy qaýipsizdikti saqtaýdy qamtamasyz etýdegi úlesi de aıtarlyqtaı», - delingen habarlamada.

Jańa keshendi tájirıbe júzinde synap kórý merzimi aıaqtalǵan soń ony budan ári jetildirý jáne jańa tehnologııalar qoldana otyryp retteletin júrginshi ótkelderine ornatý múmkindigi qarastyrylady. Ázirge ekinshi osyndaı baǵdarsham Respýblıka dańǵylynyń boıyndaǵy «Talısman» dúkeniniń aldyna ornatylmaq.