Astanada azyq-túliktiń sapasy halyqtyń kózinshe tekserilip otyrmaq
ASTANA. QazAqparat - Elorda turǵyndary men qonaqtary bazardan satyp alynǵan azyq-túlikterdiń sapasyn qolma-qol teksere alady, dep habarlaıdy QazAqparat Astana qalasynyń Qoǵamdyq densaýlyq saqtaý departamentine silteme jasap.
24 tamyz kúni (saǵat 14:00-de) «Ásem» bazary aýmaǵynda «Qaýipsiz azyq-túlikti tańdap al» atty aktsııa ótedi.
«Ár turǵyn jáne qala qonaqtary alǵan azyq-túlikteriniń qaýipsizdigin jáne sapasyn sol jerde anyqtaı alady. Aktsııa maqsaty - turǵyndardyń qaýipsiz azyq-túlikpen qamtamasyz etý týraly aqparattandyrylýyn joǵarylatý», - delingen taratylǵan habarlamada.
Bazar aýmaǵynda Astana qalasy Qoǵamdyq densaýlyq saqtaý departamentiniń, Astana qalasynyń Ulttyq saraptama ortalyǵy fılıalynyń, Salaýatty ómir saltyn qalyptastyrý ortalyǵynyń mamandary tutynýshylarǵa Astana turǵyndarynyń qoǵamdyq densaýlyǵyn nyǵaıtý jáne qorǵaý, sanıtarlyq-epıdemıologııalyq tazalyqty qamtamasyz etý, qaýipsiz azyq-túlik pen durys tamaqtanýdy nasıhattaý máseleleri boıynsha keńesterin berýge daıyn.
Astana qalasynyń Ulttyq saraptama ortalyǵy fılıalynyń mamandary Qazaqstan Respýblıkasynyń ár aımaǵynan ákelingen kókónisterdegi nıtrattardyń qaldyǵyna, taǵamdardyń mıkrobtyq lastanýyna, sút ónimderiniń qyshqyldyǵyna, baldyń taza, eshbir qospasyz bolýyna tegin laboratorııalyq ekspress-zertteý júrgizedi.
Aktsııa saýda nysandarynyń aýmaǵynda, sonyń ishinde bazar jáne qaladaǵy saýda ortalyqtarynda turaqty túrde ótkizilip turatyn bolady.
