Astanada azyq-túlik baǵasyn turaqtandyrý máselesi qaraldy
ASTANA. QazAqparat - Astana ákimi Baqyt Sultanovtyń tóraǵalyǵymen ótken ákimdiktiń kezekti jıynynda eń qajetti degen azyq-túliktiń baǵasyn turaqtandyrý máselesi qaraldy, dep habarlaıdy elorda ákimdiginiń resmı saıty.
Jıyn barysynda Astana qalasynyń Investıtsııa jáne kásipkerlikti qoldaý jónindegi basqarma basshysy Álisher Abdyqadyrov pen «Astana ÁKK» AQ basqarma tóraǵasy Nurlan Jaqypov kóterilip otyrǵan másele boıynsha qaladaǵy qabyldanǵan sharalar týraly baıandady. Sońǵy tórt jylda astanada ınflıatsııanyń ortasha jáne ósim dınamıkasy turaqty, 7,5 % quraǵany aıtyldy.
«Biz aımaqtar arasynda baǵa deńgeıiniń ósýi boıynsha 3 orynda turmyz. Bul jaqsy kórsetkish», - dep málimdedi Á. Abdyqadyrov. Onyń pikirinshe, astanadaǵy jaqsy kórsetkish «Astana ÁKK» AQ 2016 jyly iske asyrǵan saýda jelilerin jeńildikpen nesıeleý baǵdarlamasynyń arqasynda jetip otyr.
«Biz jelilerge paıyzsyz zaım usynamyz, olar aqshany ózderiniń qajettiligine qaraı alady jáne baǵany belgileıdi, ıaǵnı biz olardyń baǵany ósirmeý táýekelin óteımiz. Bul óziniń tıimdiligin kórsetken naryqtyq mehanızm», - dedi ol.
Búginge deıin «Astyqjan» sýpermarketi men «KenMart» gıpermarketimen áriptestik týraly shartqa qol qoıyldy. Qoıylǵan shartqa sáıkes, jeliler 25 taýar pozıtsııasyna baǵa belgiledi. Olar: makaron, maı, un, sút, qaımaq, tuz, irimshik, jumyrtqa, taýyq nan jáne t.b.
«Osy júıeniń arqasynda biz búginde ózge aımaqtar arasynda baǵa ósimi boıynsha 8-shi pozıtsııada turmyz. Endi osy baǵdarlamany keńeıtip, tizimde belgilengen taýarlar sanyn kóbeıtkimiz keledi. Árıne buǵan basqa da saýda jelilerin tartamyz», - dedi N. Jaqypov.
Aıta keteıik, monıtorıng boıynsha búginde qaladaǵy saýda úılerinde kúrishtiń baǵasy 240-tan 300 teńge aralyǵynda túrlenip tur. Eń tómengi baǵa kúrishtiń bir kılosy «Shapaǵat» bazarynda 240 teńge bolyp bekitildi. Qaraqumyqtyń baǵasy («Shapaǵat» JShS 110 teńge, «Artem» SÚ 180 teńge, «Ásem» SÚ 150 teńge), makaron ónimderi («Shapaǵat» JShS bir kelisi 270 teńge, «Artem» SÚ 320 teńge, «Álem» SÚ 330 teńge), un («Shapaǵatta» kılosy 210 teńge, «Artem» SÚ 360 teńge, «Álem» SÚ 350 teńge jáne «Ásem» SÚ bir kılosy 280-300 teńgeden). Odan basqa, shaı, qant, tuz jáne kúnbaǵys maıyn osy jerden arzan baǵaǵa satyp alýǵa bolady. Mysaly, shaı arzan, baǵasy shamamen 200 teńge. Bul jerden sondaı-aq bir kılo et pen et ónimderin jáne de sút pen sútten jasalǵan ónimderdi 150-200 teńgege deıin arzan satyp alýǵa bolady.
«Mysaly, árbir besinshi kılogramm et qaladaǵy «Shapaǵat» bazarynda satylady eken. Sebebi, onda qala boıynsha eń tómengi baǵa - kılosy 1350 teńgeden satylady. Al qala boıynsha orta eseptegi baǵa 1680 teńgeni quraıdy», - dedi Á. Abdyqadyrov.
