Astanada «Azııa jańǵyryǵy» tsırk óneri festıvali toǵyzynshy márte ótkiziledi (FOTO)
ASTANA. QazAqparat - Elorda kúnin merekeleý aıasynda IX «Azııa jańǵyryǵy» halyqaralyq tsırk óneri festıvali ótedi. Elorda turǵyndary men qonaqtary bir apta boıy shildeniń 2-si men 7-si aralyǵynda úzdik tsırk ujymdarynyń ónerin tamashalaıdy.
Elordanyń resmı saıtynyń habarlaýynsha, tsırk óneri marafonyna álemniń 8 memleketiniń úzdik ártisteri qatysady.
Dúnıejúzilik festıvaldardyń jeńimpazdary men júldegerleri, óz janrlaryndaǵy naǵyz sheberler, tsırk áýletteriniń ókilderi qala turǵyndary men qonaqtaryn qýantpaq. Atap aıtqanda, Belorýssııa, Gollandııa, Qazaqstan, Qyrǵyzstan, Mońǵolııa, Reseı, Túrkmenstan jáne Efıopııa ártisteri elordalyq tsırk kúmbeziniń astynda óz ónerin ortaǵa salady. Olardyń kóbi Astanaǵa alǵash ret keledi.
Festıval kórermenderi Afrıkanyń ekzotıkalyq alyptarynyń shoýyn tamashalaıdy - kerik Bagıra jáne múıiztumsyq Bonı, sondaı-aq, úıretilgen aıýlar men maımyldar manejge shyǵady.
Sonymen qatar kelýshiler nazaryna akrobattardyń ózine baýrap alatyn nómirlerin, sonyń ishinde akrobattyq jol, aýada tartylǵan jip ústinde óner kórsetetin, monotsıkl mingen ekvılıbrıstter, arqanmen júretinder, sondaı-aq, efıopııalyq ártisterdiń oryndaýyndaǵy ıkarıılik oıyndar. Festıval baǵdarlamasyna gımnastıkalyq janrlar da engizildi.
Festıval barysynda uıymdastyrylatyn jarqyn oqıǵalardyń biri - «Kavalkada» merekelik sherýi - qatysýshylar shildeniń 1-i men 4-i kúni saǵat 17.00-de úrmeli aspaptar orkestriniń súıemeldeýimen qala kóshelerimen júrip ótedi. Tsırk ártisteri Qabanbaı batyr dańǵylynyń boıymen Dostyq kóshesine deıin barady, sodan keıin Túrkistan jáne Qonaev kóshelerimen júrip, sherý Qabanbaı batyr dańǵylynda Astanalyq tsırktiń janynda aıaqtalady.
Festıval Astanada osymen toǵyzynshy ret ótkiziledi. Osy ýaqyttyń ishinde «Azııa jańǵyryǵy» tsırk óneri álemindegi ózindik brendke aınalyp, joǵary kórkemdik, uıymdastyrýshylyq jáne tehnıkalyq deńgeıde ótetin mańyzdy shara bolyp tabylady. Astanalyq tsırk jyl saıyn tórtkúl dúnıege jańa ártisterdiń talantty, túrli janrlardaǵy ártisterdiń - saıqymazaqtar men akrobattardyń, jonglerlar men ekvılıbrıstterdiń, gımnasttardyń, sıqyrshylardyń jáne ań úıretýshilerdiń esimderin jarııa etedi.
Aıta keteıik, bıylǵy festıval Qazaqstannyń Táýelsizdiginiń 25 jyldyǵyna arnalady jáne álemdik tsırk óneriniń basty jetistikterin keńinen taratýǵa, úzdik dástúrler men baǵyttardy saqtaýǵa jáne ulǵaıtýǵa baǵyttalǵan. 
