Astanada Azııa-Tynyq muhıt elderiniń «Eýrovıdenıesi» ótedi

ASTANA. QazAqparat - «Eýrovıdenıe» konkýrsynyń balamasy retinde ótkiziletin Azııa-Tynyq muhıt elderiniń «ABU Radio Song Festival» án baıqaýy bıyl Astanada ótedi, dep habarlaıdy QazAqparat tilshisi. 

«Azııa-Tynyq muhıt habar taratý odaǵyna múshe 10 memlekettiń ártisteri qatysady. Naqtyraq aıtqanda, án saıysynda Túrkııa, Nepal, Maldıv, Qazaqstan, Úndistan, Qytaı, Aýǵanstan, Indonezııa, Vetnam, Túrikmenstan elderiniń ánshileri ózara baq synasady. Festıvalde Qazaqstannyń namysyn jas oryndaýshylar Rústem Júginisov pen Djordan Arakelıan qorǵaıdy», - dedi «Qazmedıa ortalyǵynyń» bas dırektory Lázzat Júnisova.

Qazaqstan bıyl atalǵan festıvaldi ótkizetin Ortalyq Azııadaǵy birinshi el bolyp otyr. Aıtýly shara 11 shilde kúni saǵat 19:00-de «Qazmedıa ortalyǵynyń» kınokontsert zalynda bastalady. Kirý tegin.

Lázzat Júnisovanyń aıtýynsha, festıval radıoformat túrinde «Qazaq radıosy» arqyly taratylady. Al saıystyń televızııalyq nusqasyn «Kazakh TV» arnasynan kórýge bolady. Sonymen qatar, festıvaldyń tikeleı efırdegi taratylymy Túrikmenstan, Aýǵanstan, Nepal, Indonezııa men Maldıv araldarynda júrgiziledi.

Eske sala ketsek, atalmysh baıqaý elordanyń 20 jyldyq mereıtoıy qurmetine 10-12 shilde aralaǵynda Astanada ótetin «Azııa medıa dıalogy» jobasy aıasynda uıymdastyrylyp otyr. «Azııa medıa dıalogy» aıasynda  semınarlar, konferentsııalar ótkiziledi.