Astanada ázirshe shomylýǵa bolmaıdy
ASTANA. 31 mamyr. QazAqparat - Erteń, 1 maýsym kúni Astanada shomylý mezgili bastalady.
Alaıda qutqarý qyzmetiniń mamandary Esil ózeniniń sýyna ázirshe túspeı tura turýǵa keńes berip otyr.
Astana qalasynyń Tótenshe jaǵdaılar departamenti sýda qutqarý qyzmeti habarlaǵandaı, búginde Esil sýynyń temperatýrasy - +10 gradýs. Al sýǵa túsý úshin ortasha temperatýra +17 gradýs bolýy tıis. Oǵan densaýlyǵy myqty ári sýyq sýǵa úırengen azamattar ǵana shydas bere alady. Negizi, jappaı shomylý úshin sýdyń ortasha temperatýrasy - +20, al aýa temperatýrasy +22 gradýsqa deıin jetýi shart. Sýda qutqarý qyzmetiniń bastyǵy Georgıı Savrýktyń aıtýynsha, maýsym aıynda qaıǵyly oqıǵalar jıi bolyp jatady. «Sebebi qala turǵyndary sýdyń temperatýrasyna qaramaı, ózenge túsedi. Al keıbireýler mas kúıinde shomylady. Sonyń saldarynan júrek qysylyp, sińir tartylady», - deıdi G.Savrýk.
Resmı málimetke sáıkes, ótken jyly 47 adam sýǵa batyp kete jazdaǵan. 32 adam qutqaryldy. Alaıda 15 adam, onyń ishinde bir bala sýǵa ketti.
