Astanada azyq-túlikke artyq ústeme qosqan 60-tan astam kásipker anyqtaldy
ASTANA. KAZINFORM – Elordada jyl basynan beri saýda salasyndaǵy zańbuzýshylyqtarǵa baılanysty 162 ákimshilik is qozǵalǵan. Aıyppuldardyń jalpy somasy 3,3 mln teńgege jýyqtady. Bul týraly Astana qalasy boıynsha Saýda jáne tutynýshylardyń quqyqtaryn qorǵaý departamentiniń basshysy Erkebulan Taǵashov málimdedi.
Onyń aıtýynsha, bıyl áleýmettik mańyzy bar azyq-túlik taýarlaryna qosylatyn saýda ústemesin 15 paıyzdan asyrǵan 60-tan astam kásipker anyqtalǵan.
Zańǵa sáıkes, atalǵan ónimderge qosylatyn saýda ústemesi óndirýshiniń satý baǵasynan nemese kóterme jetkizýshiniń satyp alý baǵasynan 15 paıyzdan aspaýǵa tıis.
Bıyl 1 qańtardan bastap bul talapty alǵash ret buzǵandarǵa eskertý berilmeı, birden aıyppul salynady. Onyń mólsheri jeke tulǵalar men shaǵyn kásipkerlik sýbektileri úshin 5 AEK, orta kásipkerlik sýbektileri úshin 35 AEK, iri kásipkerlik sýbektileri úshin 150 AEK bolyp belgilengen. Zańbuzýshylyq bir jyl ishinde qaıtalansa, aıyppul mólsheri eki ese artady.
Departament málimetinshe, 162 ákimshilik istiń 135-i saýda ústemesin asyrýǵa, 20-sy baǵa belgilerine qoıylatyn talaptardy buzýǵa, jeteýi bazarlardy jańǵyrtý talaptaryn saqtamaýǵa qatysty.
Qazir elordadaǵy iri saýda jelilerinde, bazarlar men úı mańyndaǵy dúkenderde azyq-túlik baǵasy apta saıyn baqylanady.
– Bizdiń mindetimiz – quqyq buzýshylyqtardy anyqtaýmen ǵana shektelmeı, búkil saýda tizbeginiń ashyqtyǵyn qamtamasyz etý. Biz ónimniń óndirýshiden sońǵy satýshyǵa deıingi qozǵalysyn qadaǵalap, baǵany negizsiz kóterýge jol bergen kásipkerlik sýbektilerine qatysty sharalar qabyldaımyz, – dedi Erkebulan Taǵashov.
Sondaı-aq elordada baǵanyń negizsiz ósý sebepterin anyqtaıtyn óńirlik komıssııa jumys isteıdi. Jyl basynan beri komıssııanyń 90 otyrysy ótip, 150-den astam zańbuzýshylyq anyqtalǵan.
Buǵan deıin Soltústik Qazaqstan oblysynda azyq-túlik baǵasyn negizsiz kótergen 126 kásipkerdiń jaýapkershilikke tartylǵanyn jazǵan edik.