Astanada azyq-túlik taýarlarynyń assortımenti keńeıtildi — ÁKK qosymsha qarjy suraıdy

ASTANA.KAZINFORM — Astanada áleýmettik mańyzy bar azyq-túlik baǵasyn turaqtandyrýǵa arnalǵan tyńdaýlarda áleýmettik-kásipkerlik korporatsııasy (ÁKK) «Astana» qosymsha qarjylandyrý tartý máselesin kóterdi.

ÁKK «Astana» basqarma tóraǵasy Baýrjan Baımuqashevtiń aıtýynsha, qazirgi ýaqytta áleýmettik mańyzy bar azyq-túlik baǵasyn turaqtandyrýǵa korporatsııa qaramaǵynda aınalym qarajaty retinde bólingen 10,7 mlrd teńge bar.

— 2024 jyly ÁKK qaramaǵynda 13 mlrd teńge kóleminde qarjy bolǵan. Onyń 1 mlrd teńgesi jergilikti atqarýshy organnyń talabymen qaıtaryldy. Al 1,3 mlrd teńge Esep komıtetiniń tekserisi nátıjesinde bıýdjetke keri qaıtaryldy. Qazirgi ýaqytta ÁKK Investıtsııalar basqarmasymen birlesip, qosymsha qarjy tartý úshin zaım alý máselesin pysyqtap jatyr. Qoldanystaǵy 10,7 mlrd teńge tolyq ıgerildi. Qarjy 23 kelisimshart aıasynda jumsaldy, — dedi B.Baımuqashev.

Onyń málimetinshe, bólingen qarjynyń shamamen 4 mlrd teńgesi — kókónis ónimderin qarjylandyrýǵa, 1,3 mlrd teńgesi — jumyrtqa ónimderine, 1,2 mlrd teńgesi — Merki qant zaýytyna, 500 mln teńgesi — Qostanaı oblysyndaǵy «Qarasý et» kásipornyna, 200 mln teńgesi — qus etine baǵyttalǵan.

Sonymen qatar, 10,7 mlrd teńgeniń bir bóligi — 8 oblysqa berilgen qaryzdar. Alaıda 900 mln teńgeniń qaıtarylýy qamtamasyz etilmegen. Qazirgi tańda bul qarajatty qaıtarý boıynsha jumystar jalǵasyp jatyr.

Spıkerdiń aıtýynsha, áleýmettik mańyzy bar azyq-túlik taýarlaryna baǵany turaqtandyrý tetigi jalpy oń nátıje berip jatyr.

— Ónim túrleriniń sany Úkimet bekitken 8 ataýdan 19-ǵa deıin keńeıtildi. Áleýmettik ónimderdi satatyn saýda núkteleri 2022 jyly 80 bolsa, bıyl 190-ǵa jetti. Satyp alynatyn ónim kólemi 12 myń tonnadan 35 myń tonnaǵa deıin ulǵaıdy. Deldaldardy alyp tastaý jumysy júrip jatyr, qaryz qarajat negizinen aýyl sharýashylyǵy ónimderin óndirýshilerge beriledi. Keı jaǵdaılarda saýda jelilerine de qarjy baǵyttalady — bul baǵany ustap turý úshin qajet, — dedi Baımuqashev.

Sonymen qatar, ol ÁKK «Astana» elordanyń saýda oryndarynda baǵany turaqty baqylaýda ustap otyrǵanyn atap ótti.

Buǵan deıin, áleýmettik mańyzy bar azyq-túlik taýarlary tranzıtine baqylaý kúsheıgenin jazǵanbyz.