Astanada azyq-túlik baǵasyna baqylaý kúsheıtildi
ASTANA. KAZINFORM — Jyl basynan beri 32 otyrys ótkizilip, saýda ústemesiniń ruqsat etilgen deńgeıden asýyna qatysty 80-nen astam is tirkelgen.
Astanada azyq-túlik qaýipsizdigin qamtamasyz etý jáne «Zań men tártip» qaǵıdatyn saqtaý boıynsha keshendi sharalar júzege asyrylyp jatyr. Osy baǵytta júrgizilip jatqan júıeli jumys týraly Kommýnıkatsııalar qyzmetindegi brıfıngte qalalyq Investıtsııalar jáne kásipkerlikti damytý basqarmasy basshysynyń orynbasary Maqsat Jańabaev pen «Astana» ÁKK» AQ basqarma tóraǵasynyń orynbasary Dilmurat Iminov aıtyp berdi.
Elordada azyq-túlik qaýipsizdigin qamtamasyz etýge jáne áleýmettik mańyzy bar azyq-túlik taýarlarynyń baǵasyn turaqtandyrýǵa baǵyttalǵan júıeli jáne jedel sharalar kesheni júzege asyrylyp jatyr. Shamamen 24 myń tonna ónim jetkizýge kelisimsharttar jasalyp, olardy ótkizý 190-nan astam saýda orny arqyly uıymdastyrylǵan.
— Qosymsha retinde saýda jelilerimen saýda ústemesin 10%-dan asyrmaýdy kózdeıtin kelisimder jasaldy, bul baǵany turaqtandyrýǵa yqpal etedi.
Qabyldanǵan sharalar oń dınamıka kórsetip otyr: 2024 jyldyń qorytyndysy boıynsha deflıatsııa deńgeıi 98,9% boldy, 2025 jyly ınflıatsııa 107,4%.
2026 jyldyń basynan beri Astanada baǵa ındeksi 101,1% deńgeıinde qalyptasty, bul respýblıkalyq ortasha kórsetkishten tómen. Bul baǵany retteý jáne azyq-túlik turaqtylyǵy salasynda júrgizilip jatqan saıasattyń tıimdiligin rastaıdy, — dep habarlady spıkerler.
Deldaldyq shemalardy tergeý jónindegi óńirlik komıssııa naryqtaǵy zań buzýdy júıeli túrde anyqtap otyr. 2026 jyldyń basynan beri 32 otyrys ótkizilip, saýda ústemesiniń ruqsat etilgen deńgeıden asýyna qatysty 80-nen astam is tirkelgen.
Sonymen qatar kún saıyn baǵa monıtorıngi júrgizilip, jetkizýshilerdiń kelisimsharttyq mindettemelerdi oryndaýyn baqylaý júrgiziledi, bul taýar jetkizý tizbeginiń ashyqtyǵyn arttyrady.
Mańyzdy baǵyttardyń biri — agroónerkásip keshenin jáne logıstıkalyq ınfraqurylymdy damytý.
Jol kartasy aıasynda jalpy somasy 180 mlrd teńge bolatyn 7 ınvestıtsııalyq joba júzege asyrylyp, shamamen 1,6 myń jumys orny qurylyp jatyr. Qosymsha retinde 40 mlrd teńgeden astam ınvestıtsııa kólemimen agrarlyq-ındýstrııalyq aımaq qurý jáne logıstıkalyq park qalyptastyrý josparlanyp otyr.
— Qalalyq saıasattyń mańyzdy quramdas bóligi — saýda salasynda quqyqtyq tártipti qamtamasyz etý. Naryqtar men saýda oıyn-saýyq ortalyqtaryna beıindi vedomstvolardyń qatysýymen turaqty túrde tekserýler júrgiziledi, onda sanıtarlyq normalardy, órt qaýipsizdigi talaptaryn jáne salyq zańnamasyn saqtaý erekshe nazarda bolady.
2026 jyldyń basynan beri 15 zańsyz saýda nysany demotajdaldy, al 2025 jyldyń qorytyndysy boıynsha olardyń sany 225 bolǵan. Sonymen qatar metall synyqtarynyń aınalymy salasyndaǵy zańsyz qyzmettiń jolyn kesý boıynsha jumys júrgizilýde, bul úshin 2024 jyldan bastap mindetti lıtsenzııalaý engizilgen.
Jalpy, Astanada júzege asyrylyp jatqan keshendi jumys ekonomıkanyń jáne áleýmettik salanyń negizgi baǵyttaryn qamtyp, ári qaraıǵy ósim úshin berik negiz qalyptastyrýda, — dep qosty spıkerler.
Aıta ketelik Astanada merekelik aýyl sharýashylyǵy jármeńkesi ótedi.