Astanada ázerbaıjannyń jalpy ulttyq lıderi Geıdar Álıevti eske túsirýde
ASTANA. 10 maýsym. QazAqparat /Aınur Kenebaeva/ - 10 mamyr - Ázerbaıjan eliniń tarıhynda aıtýly kún sanalady. Búgin - saıası sahnada aıryqsha bedelge ıe bolǵan ázerbaıjan ultynyń kórnekti ókili Geıdar Alıevtyń týǵan kúni.
Osyǵan oraı, Eýrazııa ulttyq ýnıversıtetinde búgin Geıdar Álıevtiń qurmetine arnalǵan eske alý otyrysy bolyp ótti. Atalmysh shara Eýrazııa ulttyq ýnıversıteti men Ázerbaıjannyń Qazaqstandaǵy Elshiliginiń birlesken bastamasy negizinde uıymdastyrylyp otyr.
Shara eki el arasyndaǵy dostyq qarym-qatynas pen iri saıası qaıratkerge qazaq eli tarapynan kórsetilgen zor qurmetiniń kórinisi sanalatyn ulttyq ýnıversıtet qabyrǵalarynda arnaıy uıymdastyrylǵan Geıdar Álıev dárishanasynda boldy. Aıta ketelik, atalmysh oryn 2010 jyly ashylǵan bolatyn.
«Geıdar Álıevtiń bizdiń ultymyzdyń ómiri men tarıhynda alatyn orny aıryqsha. El basyna kún týǵan qysyltaıań shaqta ol óziniń kóregendigimen, parasatty saıasatymen Ázerbaıjan eliniń bútindigin saqtap qala bildi. Bizdiń búgingi qol jetkizip otyrǵan jetistikterimiz el baqytyna bola týǵan erekshe tulǵanyń arqasynda aqıqatqa aınaldy», - dedi dóńgelek ústel otyrsy barysynda sóz sóılegen Ázerbaıjan eliniń Qazaqstandaǵy Tótenshe jáne Ókiletti elshisi Zakır Gashımov.
EUÝ-niń rektory Baqytjan Ábdiraıym da óz kezeginde qazaq eli Geıdar Álıevtiń tarıhı tulǵasyn erekshe baǵalaıtyndyǵyn atap ótip, búgingi sharanyń Qazaqstan men Ázerbaıjan arasyndaǵy dostyq qarym-qatynasty nyǵaıta túsý jolynda mańyzdy oryn alatyndyǵyn aıtty. «Ázerbaıjan eli óz basshysymen tebirene qoshtasqan sátte Nursultan Nazarbaev túrki álemi óziniń uly tulǵasyn joǵaltty dep beker aıtpasa kerek, bul sózder tek bizdiń Elbasynyń ǵana emes, jalpy qazaq eliniń Geıdar Álıevke degen qurmetin tanytady», - dedi ol óz sózinde.
Shara barysynda rejısser Andreı Konchalovkııdiń Geıdar Álıevtiń qyzmeti men ómiri jaıly túsirilgen derekti fılmi kórsetildi.
