Astanada Ázerbaıjan prezıdentiniń kózinshe egilgen kóshetter nelikten qaıta alyndy
ASTANA. QazAqparat – Astana qalasy Esil aýdany ákiminiń orynbasary Dármenııar Qydyrbekuly Geıdar Álıev kóshesiniń boıyna Ázerbaıjan prezıdenti kelgen kezde egilgen shyrshanyń nege qaıta qazylǵanyn túsindirdi, dep habarlaıdy QazAqparat tilshisi.
Ákimdik ókiliniń aıtýynsha, shyrsha kóshetteriniń qaıta qazylǵany ras. Biraq ol shyrshalardyń ornyna basqa aǵash egilgen. Mundaı keńesti olarǵa agronomdar berse kerek.
«Ázerbaıjan Respýblıkasy prezıdentiniń resmı sapary aıasynda Geıdar Álıev kóshesi saltanatty túrde ashylǵan bolatyn. Buqar jyraý kóshesiniń Geıdar Álıev kóshesimen qıylysqan tusynda bes shyrsha otyrǵyzyldy.
Keıin agronomdar bizge bul shyrshalardy qylqan japyraqty aǵashtardyń ósýine áldeqaıda qolaıly orynǵa – Botanıkalyq baqtaǵy Ázerbaıjan prezıdenti óz qolymen ekken aǵashtan 100 metr jerge aýystyryldy.
Al olardyń ornyna jóke men arsha egildi. Óıtkeni jóke magıstraldik joldyń boıynda jaqsy ósedi jáne estetıkalyq kóriniske sán qosady», - dedi Dármenııar Qydyrbekuly.
Eske salaıyq, Ázerbaıjan basshysy Ilham Álıev Astanaǵa 10 sáýirde kelgen bolatyn.Sapar barysynda Qazaqstan jáne Ázerbaıjan prezıdentteri Geıdar Álıev atyndaǵy kósheniń saltanatty ashylýna qatysty. Keıin Qasym-Jomart Toqaevtyń qatysýymen Ázerbaıjan prezıdenti Ilham Álıev Botanıkalyq baqta aǵash otyrǵyzdy.
