Astanada Azaptaýǵa qarsy ulttyq aldyn alý tetigi Úılestirý keńesiniń otyrysy ótti
ASTANA. QazAqparat - Búgin Astanada Qazaqstan Respýblıkasyndaǵy Adam quqyqtary jónindegi ýákil Asqar Shákirovtiń tóraǵalyǵymen Azaptaýǵa qarsy ulttyq aldyn alý tetiginiń Úılestirý keńesiniń kezekti otyrysy ótti. Onda Ulttyq aldyn alý tetigi (UAT) jumysynyń aǵymdaǵy kezeńin taldama, aldaǵy baǵyttary anyqtaldy, dep habarlaıdy QazAqparat.
Kún tártibine sáıkes 2016 jylǵy aldyn ala barýlardyń qorytyndysyna arnalǵan Jınaqtalǵan baıandamada kórinis tapqan usynymdardy qyzmettik organdardyń oryndaýy týraly aqparat qaraldy. UAT mandatpen basqarylatyn mekemelerinde ornalasqan tulǵalardyń quqyqtaryn saqtaý boıynsha baıandamanyń tıisti bólikterine júrgizilgen taldamasy kórsetildi. Talqylaý barysynda Úılestirý keńesiniń músheleri birqatar memlekettik organdar ǵana sottalǵandardyń ustaý jaǵdaılaryn, medıtsınalyq qyzmet kórsetilýin jaqsartýǵa baǵyttalǵan usynymdardy laıyqty túrde oryndaıtyndyǵyna nazar aýdardy. Bul rette UAT jáne memlekettik organdardyń ortalyq jáne jergilikti deńgeıde mekeme ákimshilikteri arasyndaǵy ózara yqpaldasýynyń tıimdiligin odan ári arttyrýdyń, sondaı-aq Úılestirý keńesiniń usynymdaryn oryndaý baǵytynda jańa tetikter qarastyrýdyń mańyzdylyǵy atap ótildi. Osyǵan baılanysty, jekelegen vedomstvolardyń usynymdardy tıisti deńgeıde oryndaýy úshin Úkimet basshylyǵyna júginý týraly sheshim qabyldandy.
«Sondaı-aq, mandatpen basqarylatyn mekemelerge arnaıy barý nátıjeleri de qaraldy. Atap aıtqanda, Soltústik Qazaqstan oblysy boıynsha ES-164/4 mekemesinde bolǵan oqıǵany qarastyrýǵa erekshe nazar aýdaryldy. Adam quqyqtary jónidegi ýákildiń atyna joǵaryda atalǵan mekemede jazasyn ótep jatqan Vadım Kýramshınniń múddesine qatysty SQO boıynsha UAT qyzmetkerleri tobynyń aldyn ala barýlardy júzege asyrý barysynda zańsyz áreketteri týraly birneshe aryzy kelip túsken bolatyn. Bolǵan jaǵdaıǵa monıtorıng júrgizý maqsatynda atalmysh toppen joǵaryda kórsetilgen mekemege arnaıy barý uıymdastyryldy. Onyń qorytyndysy boıynsha sottalǵandarǵa azaptaý jáne qatygez qarym-qatynas faktileri aıqyndalyp, Adam quqyqtary jónindegi ýákil atyna, sondaı-aq áreket etý sharalaryn qabyldaý úshin prokýratýra organdaryna jiberildi», - delingen baspasóz baıanynda.
Sonymen qatar, BAQ-ta jarııalanǵan V. Kýramshınge qatysty oryn alǵan azaptaý jónindegi, sonyń ishinde, onyń bergen túsiniktemesi negizinde de málimdeme óz dálelin tappaǵan. Atalmysh oqıǵany Úılestirý keńesiniń músheleri qarap, SQO boıynsha UAT óńirlik toby azaptaý faktilerin aıqyndaý jáne qajetti jedel sharalar qabyldaý boıynsha júıeli jumys atqarǵany týraly qorytyndy jasady.
Osyǵan oraı keńeske qatysýshylar UAT jumysynyń tıimdiligin qamtamasyz etý maqsatynda onyń mánin burmalaýdyń túrli áreketterin toqtatý týraly pikir aıtty. Talqylaý qorytyndysy boıynsha Úılestirý keńesi tıisti sheshimder qabyldady.
