Astanada azamattyq bastamalardy qoldaý ortalyǵy qurylady- elorda ákimi

ASTANA. QazAqparat - Astanada azamattyq bastamalardy qoldaý ortalyǵy qurylatyn bolady. Bul týraly búgin Astana qalasynyń ákimi Baqyt Sultanov qalalyq VIII Azamattyq forým barysynda málim etti, dep habarlaıdy QazAqparat tilshisi.

«Biz azamattyq qoǵam men úkimettik emes uıymdar qyzmetiniń damýy úshin barlyq jaǵdaıdy jasaýymyz kerek. Osy maqsatta azamattardyń bastamalaryn qoldaıtyn kovorkıng ortalyǵyn qurý josparlanýda jáne ol barlyq úkimettik emes uıymdarǵa (ÚEU) qoljetimdi bolýy tıis», - dedi elorda ákimi Baqyt Sultanov forýmda sóılegen sózinde.

Onyń aıtýynsha, búginde ákimdik 30-dan astam ÚEU-men birlesip, 463 mln teńgeniń 66 áleýmettik mańyzy bar aýqymdy jobasyn júzege asyrdy.

Sonymen qatar, qala basshysy Elbasynyń Joldaýyndaǵy barlyq áleýmettik bastamalardy júzege asyrýda ÚEU men memlekettik uıymdardyń birigip jumys jasaý kerektigin aıtyp ótti.

«Qazirde elordalyq ÚEU-men birlesip halyqtyń turmystyq ómirin jaqsartýǵa baǵyttalǵan naqty áleýmettik mańyzy bar jobalar júzege asyrylýda. Sonyń bir kórsetkishi retinde «Pravo» qoǵamdyq qorynyń daǵdaryspen kúres ortalyǵyn qurý tájirıbesin aıtar edim. Búgingi tańda qoǵamdyq qordyń osy sekildi elimiz boıynsha 11 daǵdarysqa qarsy ortalyǵy ashylyp, onda áskerı aımaqtar men terrorıstik áreketter belsendi júrip jatqan kúrdeli terrıtorııalardan kelgen balalardy áleýmettendirý jumystary júrgizilýde», - dedi ol.

Sonymen qatar Astana ákimi «Rýhanı jańǵyrý» baǵdarlamasy aıasynda iske asyrylyp jatqan jobalarǵa da toqtaldy.

Atap aıtqanda, ákimdik «Jas Ulan» jasóspirimder qoǵamdyq uıymymen birigip «Meniń Otanym -Qazaqstan» atty elordanyń oqýshylaryna arnalǵan ólketaný-ekologııalyq ortalyǵyn qurdy. Ekologııa, ólketaný jáne týrızm baǵyttary boıynsha jumys isteıtin ortalyq arqyly qaladaǵy 3780 belsendi oqýshynyń jasaǵy qurylǵan. Odan bólek, «ZhasStar» jastar saıasaty ortalyǵy men Jastardyń áleýmettik jáne turaqty damý qory «Jastar jalyny», «Jas aqyndar aıtysy» sekildi 1000-nan astam shyǵarmashyl jastardyń basyn biriktirgen jobalar júzege asyrylýda.

«Sózimdi qorytyndylaı kele, úkimettik emes uıymdar áleýmettik, ekonomıkalyq, quqyqtyq mazmundaǵy máselelerdi sheshýde memlekettik organdardyń senimdi seriktesi ekenin atap ótkim keledi. Bul rette, elimizde júrip jatqan jańǵyrtý aıasynda azamattardyń qoǵamdyq múddelerin qamtamasyz etetin úkimettik emes uıymdardyń qyzmeti aıryqsha mańyzdy» , - dedi B.Sultanov.

Buǵan deıin habarlaǵanymyzdaı, búgin Astanada VIII qalalyq azamattyq forýmy ótti.