Astanada azamattarǵa tegin zańdyq keńes beretin «Zań kabıneti» jobasy tanystyryldy
ASTANA. QazAqparat - Oblys ortalyqtaryndaǵy HQKO-na kún saıyn myńǵa jýyq, al Astana men Almaty qalalarynda árbir bólimshege 3 myńǵa jýyq azamat keledi. Mundaı málimetterdi búgin Astanada Halyqqa qyzmet kórsetý ortalyqtaryndaǵy azamattarǵa quqyqtyq kómek kórsetetin «Zań kabıneti» jobasynyń tanystyrylymynda Law Companies Group Lunev Waters kompanııasynyń Bas dırektory Ilıa Lýnev aıtty.
«Kóp jaǵdaıda HQKO-ǵa kelýshiler quqyqtyq kómekke, onyń ishinde zańdyq keńes alýǵa muqtaj bolady. Mundaı jaǵdaıda azamattarǵa zań turǵysyndaǵy máselelerdi sheshý úshin HQKO-da qajetti quqyqtyq keńes beretin kásibı zańgerlerdiń bolmaýyna baılanysty qıyndyqtar týyndaýy múmkin. Sonymen qatar, atalǵan tulǵalar úshin zańgerler tarapynan beriletin quqyqtyq keńester táýelsiz bolǵany abzal», - dep atap ótti I. Lýnev. Onyń aıtýynsha, atalmysh kompanııa «Zań kabıneti» aıasynda «Sizdiń senimdi keńesshińiz» jobasyn júzege asyrýda. Ol joba sheńberinde barsha qazaqstandyq azamattarǵa quqyqtyq keńes berý qyzmeti usynylady. Joba qazirdiń ózinde el arasynda senimge ıe bolyp, olardyń joǵary baǵasyn alýda. «Sizdiń senimdi keńesshińiz» jobasy jeke-jeke tarmaqtarǵa jiktelgen: «Ókiletti ókil» jobasy Báıterek monýmenti, Kongress Holl, Beıbitshilik jáne kelisim saraıy, Táýelsizdik saraıy, Kórme ortalyǵy sııaqty memlekettik mańyzdy oryndarda júzege asyrylady. Sonymen qatar, «Memlekettik qyzmetkerlerge zańdyq kómek kórsetý ortalyǵy» jáne JOO-larmen birlese júzege asyrý josparlanǵan «Zań klınıkasy» sııaqty jobalar bar. Taǵy bir joba búginde qoldanysta bar «Nur Otan» HDP-nyń qoǵamdyq qabyldaýlaryndaǵy «Sizdiń halyqtyq keńesshińiz» dep atalatyn joba. Sondaı-aq, Oqýshylar saraıy negizinde arnaıy balalara úıirmelerin ashý da josparlanǵan», - dep atap ótti I. Lýnev. Kompanııa basshysynyń aıtýynsha, «Zań kabıneti» jobasyn júzege asyrýda bıýdjettik qarajattan shyǵyn shyqpaıdy. Óıtkeni zańdyq keńester tegin kórsetiledi, al keńes berýshiler zań kompanııasynyń qyzmetkerleri bolyp tabylady. HQKO azamattardyń quqyqtyq keńester alýyna jaǵdaı jasaý úshin zańgerlerge operatsııalyq zal ishinde bir oryn nemese jeke bólme bólip beredi. «Zań kabıneti» jobasy memlekettik quzyrly organnyń mıssııasy men qyzmetterin tıimdi oryndaýǵa kómek beredi. Sonymen qatar Memleket basshysynyń halyqqa joldaýynda jarııa etken tapsyrmalaryn júzege asyrýǵa septigin tıgizedi. Bastysy, turǵyndardyń quqyqtyq mádenıetin kóterip, quqyqtyq nıgılızmdi joıýǵa yqpal etedi», - dep atap ótti I. Lýnev. Aıta keteıik, qazir jobanyń bastapqy kezeńi elimizdiń birqatar oblys ortalyqtarynda iske qosyldy. Olar Aqmola, Qaraǵandy, Jambyl, Ońtústik Qazaqstan oblystary men Astana, Almaty qalalary. Aldaǵy ýaqytta «Zań kabıneti» elimizdiń barlyq aımaqtaryn qamtyp, aýdandyq deńgeıde qyzmet kórsetedi degen jospar bar. Zań kabınetiniń jumys isteý tártibi HQKO-nyń kún tártibine sáıkes senbi, jeksenbi kúnderden ózge kúndelikti saǵat 9:00-20:00 aralyǵynda.
