Astanada az qamsyzdandyrylǵan otbasydan shyqqan stýdentterge áleýmettik kómek kórsetildi
«Qamqorlyq» respýblıkalyq aktsııasy aıasynda az qamsyzdandyrylǵan jáne kóp balaly otbasydan shyqqan eki stýdentke qaıyrymdylyq kómek kórsetildi. Aıta keteıik, is-sharany qalalyq Balalardyń quqyqtaryn qorǵaý basqarmasy «Danalyq» kolledjimen birlesip uıymdastyrdy.
«Jyl saıynǵy «Qamqorlyq» respýblıkalyq aktsııasy altynshy jyl qatarynan ótkizilip keledi. Aktsııa barysynda jappaı oqý qory arqyly az qamsyzdandyrylǵan otbasylardan shyqqan balalarǵa qol ushyn berýge basa nazar aýdarylady. Bıyl bilim mekemelerindegi jumysty jandandyramyz jáne atalmysh is-sharany ótkizýge demeýshilerdi: úkimettik emes uıymdardy, qoǵamdyq qorlardy da tartyp otyrmyz», - dedi Balalardyń quqyqtaryn qorǵaý basqarmasynyń basshysy Rımma Imanǵazınova astana.kz saıtyna bergen suhbatynda.
Eske salaıyq, «Qamqorlyq» aktsııasy az qamsyzdandyrylǵan jáne kóp balaly otbasylardan shyqqan balalarǵa kómek kórsetý maqsatynda 10 qańtardan 10 aqpanǵa deıin ótkiziledi. Aktsııa aıasynda turmysy tómen otbasylardan shyqqan 3 myńǵa jýyq balaǵa járdem berý kózdelgen.