Astanada Aıtqalı Jaıymovtyń shyǵarmashylyq keshi ótedi
ASTANA. QazAqparat - Búgin, 26 qazan kúni «Astana» kontsert zalynda (burynǵy Kongress holl saraıy) Qazaqstan Respýblıkasynyń eńbek sińirgen qaıratkeri, Qazaqstan kompozıtorlar odaǵynyń múshesi, QR bilim berý isiniń qurmetti qyzmetkeri, belgili kompozıtor, dáýlesker kúıshi, kórnekti dırıjer, professor Aıtqalı Jaıymovtyń «Uly dala perzentimin» atty shyǵarmashylyq keshi ótedi.
Osy óner keshi kompozıtordyń 70 jasqa tolǵan mereıtoıyna arnalǵan.
Bul sharany Astana qalasy ákimdiginiń memlekettik akademııalyq fılarmonııasy uıymdastyrǵan.
Osy keshte Astana qalasy ákimdiginiń memlekettik akademııalyq fılarmonııasynyń Qazaq halyq aspaptary orkestriniń kórkemdik jetekshisi ári bas dırıjeri Aıtqalı Jaıymovtyń ánderi jáne mýzykalyq shyǵarmalary oryndalady dep kútilýde. Sondaı-aq kompozıtordyń uly, respýblıkalyq konkýrstardyń laýreaty Arman Jaıymnyń da kúrdeli mýzykalyq týyndylary kórermen nazaryna usynylmaq.
Aıtqalı Jaıymovtyń shyǵarmashylyq keshi saǵat 19-00-de bastalady.
