Astanada Áıteke bı kóshesiniń bir bóligi ýaqytsha jabylady

ASTANA. KAZINFORM — Astana qalasynyń Kólik jáne jol-kólik ınfraqurylymyn damytý basqarmasy Áıteke bı kóshesiniń Q. Muhamedhanov kóshesinen Syǵanaq kóshesine deıingi aralaǵynda jol tóseminiń joǵarǵy qabatyn tóseý jumysyn júrgizedi.

Astana ákimdiginiń málimetinshe, osyǵan baılanysty osy ýchaskedegi qozǵalys ishinara kezeń-kezeńimen jabylatyn bolady.

Bul rette avtokólik quraldarynyń qozǵalysy bir baǵytta ǵana uıymdastyrylatyn bolady: 15-18 qyrkúıek aralyǵynda Q. Muhamedhanov kóshesinen Syǵanaq kóshesine qaraı, sodan keıin 19-23 qyrkúıek aralyǵynda Syǵanaq kóshesinen Q. Muhamedhanov kóshesine qaraı.

— Júrgizýshiler men jaıaý júrginshilerden marshrýttardy aldyn ala josparlaýdy jáne qozǵalysty uıymdastyrýdaǵy yqtımal ózgeristerdi eskerýdi suraımyz, — delingen habarlamada. 

Qaýipsizdikti qamtamasyz etý jáne qolaısyzdyqty azaıtý úshin ýaqytsha jol belgileri men kórsetkishter ornatylatyn bolady.

Aıta ketelik Astanada Aqtóbe oblysynyń aýyl sharýashylyǵy jármeńkesi ótip jatyr.