Astanada áıgili jelaıaq Ámın Tuıaqovqa arnalǵan týrnır bastaldy
ASTANA. QazAqparat - Astana qalasynda Ámın Tuıaqovtyń júldesine arnalǵan І Halyqaralyq týrnıri bastaldy, dep habarlaıdy QazAqparat QR Jeńil atletıka Federatsııasynyń baspasóz qyzmetine silteme jasap.
Tuńǵysh ret jalaýyn kótergen jarysqa Tájikstan, Gonkong, Qyrǵyzstan jáne Qazaqstannan eki júzge tarta sportshy qatysyp jatyr.
«Elorda tórinde jeńil atletıkadan KSRO-nyń Eńbek sińirgen sport sheberi, elimizdiń eńbek sińirgen qaıratkeri Ámın Elemesuly Tuıaqovtyń qurmetine jeńil atletıkadan halyqaralyq týrnır ótip jatyr. Alys-jaqyn bes memleket sportshylary baq synaǵan jarys aldaǵy ýaqytta dástúrli túrde jalǵasyn tabady dep úmittenemin. Ámın aǵamyzdyń otandyq jeńil atletıkaǵa qosqan úlesi orasan zor. Biz osyndaı azamattardy ardaqtap, barynda baǵasyna jetýge tıispiz. Al óskeleń urpaq, jas sportshylar aldyńǵy býyn aǵalarynyń jolyn jarqyn jeńisterimen jalǵaýy tıis», - dedi QR Jeńil atletıka Federatsııasynyń bas hatshysy Ashat Seısembek.
Jarys baǵdarlamasyna jeńil atletıkanyń mynadaı túrleri kiredi:
• Júgirý – 60m, kedergilermen 60m, 400m, 800m, 3000m;
• ıAdro ıterý;
• Uzyndyqqa sekirý;
• Bıiktikke sekirý.
Sonymen qatar jarys baǵdarlamasyna 14 jasqa deıingi balalar arasynda 60 m qashyqtyqqa júgirý jáne 4h200m aralas estafeta (2ul + 2qyz) engizildi.
Jarystyń jeńimpazdary men júldegerlerine aqshalaı syıaqy taǵaıyndalǵan.
Jarystyń saltanatty ashylý rásimine Ámın Tuıaqov, QR mádenıet jáne sport vıtse-mınıstri Serik Jarasbaev, jeńil atletıka federatsııasynyń bas hatshysy Ashat Seısembek qatysty.
«Jeńil atletıkaǵa arnalyp salynǵan osyndaı manejde halyqaralyq jarystardyń kóptep ótkeni jaqsy. Bıyl meniń atyma arnalǵan jarys birinshi ret uıymdastyrylyp otyr, óte qýanyshtymyn. Saıysta ártúrli elderdiń sportshylary baq synap jatyr, bul bizdiń sportshylarymyzdy úlken jarystarǵa daıyndaýǵa kómektesedi. Qazaqstandyq jeńil atletter osyndaı básekelerge túsý arqyly shyńdalady, ózge el sportshylarynan úlgi alady», - dedi jeńil atletıkadan Eýropa chempıonatynyń júldegeri Ámın Tuıaqov.
Aıta keteıik, Ámın Tuıaqov jeńil atletıkadan KSRO-nyń Eńbek sińirgen sport sheberi, Qazaqstannyń eńbek sińirgen qaıratkeri, Mańǵystaý oblysynyń qurmetti azamaty. KSRO chempıonatynyń jeńimpazy jáne júldegeri, KSRO rekordshysy, Eýropa Kýbogynyń ıegeri, Eýropa chempıonatynyń júldegeri.
