Astanada áıgili músinshi Tsadok Ben-Davıdtiń jeke kórmesi ótedi (FOTO)
ASTANA. QazAqparat - 26 qyrkúıek kúni Qazaqstan Respýblıkasy Ulttyq mýzeıinde Mádenıet jáne sport mınıstri Arystanbek Muhamedıulynyń qatysýymen qazirgi zamannyń eń áıgili músinshileriniń biri Tsadok Ben-Davıdtiń (Zadok Ben-David, Anglııa, London) «Tún ortasynyń arǵy beti» atty jeke kórmesi ashylady.
Bul týraly Ulttyq mýzeıdiń baspasóz qyzmeti habarlady.
Ortalyq Azııa aýmaǵynda tuńǵysh ret uıymdastyrylyp otyrǵan kórme Ulttyq mýzeıdiń Zamanaýı zaldarynda 2014 jyldyń 26 qyrkúıegi men 5 jeltoqsany aralyǵynda ótedi.
Ekspozıtsııa 3 ınstallıatsııadan jáne músinnen turady. Árbir ınstallıatsııa sýretshiniń aqıqatqa aınalǵan oıy men qııalynyń kókjıegin kórsetip, ónersúıer qaýymdy biregeıligimen tań qaldyrady.
Installıatsııalardy jasaý úshin sýretshige 10 adam assıstent boldy. Olar Tsadok Ben-Davıdpen birge 3 jyl tynymsyz eńbek etti.
Tsadok Ben-Davıd 1949 jyly Iemende dúnıege kelgen. Bala kezinde ata-anasymen birge Izraılge qonys aýdarǵan. Ierýsalımdegi Betsalel Ulttyq óner akademııasynda (Bezalel Academy of Arts) bilim alǵan. Keıin Redıng ýnıversıtetin (Design University of Reading) jáne Áýlıe Martın atyndaǵy Ortalyq óner jáne dızaın kolledjin (Central Saint Martins College of Art and Design) támamdap, oqýyn Anglııada jalǵastyrǵan. Qazir sýretshi Londonda jumys isteıdi.
Sýretshiniń jeke kórmeleri Londonnan Ońtústik Koreıaǵa deıin dúnıejúzinde únemi joǵary deńgeıde ótedi. Muny kórmege kelýshiler sanynan ańǵarýǵa bolady.
1988 jyly Venetsııada ótken halyqaralyq zamanaýı óner bıennalesine ol Izraıl atynan qatysty. 2008 jyly Pekınde ótken jazǵy Olımpıada oıyndarynyń resmı músinshisi retinde tańdaldy.
Ben-Davıd Tsadok - kóptegen marapattar men syılyqtardyń laýreaty: Portýgalııada ótken 14-shi Halyqaralyq bıennaleniń (2007) birinshi júldesin; Tel-Avıv mýzeıiniń músin ónerindegi jetistikteri úshin syılyǵyn (2005) ıelengen..
Tsadok Ben-Davıdtiń jasaǵan músinderi ıAd va-Shem memorıaldyq keshenindegi (Izraıl) Partızan panoramasynyń naq ortasynda ornalasqan. Sońǵy birneshe jyl ishinde Ben-Davıdtiń shyǵarmalary Italııa, Germanııa, Qytaı, Ońtústik Koreıa, AQSh, Sıngapýr, Ýkraınada kórsetildi. Onyń shyǵarmalary Eýropa, Shyǵys Azııa, AQSh, Izraıl, Avstrııanyń memlekettik jáne jeke kollektsııalaryna engen.
Tsadok Ben-Davıd dúnıe júzinde keń tanylǵan jáne kópshilik moıyndaǵan ózindik kórkem stılin qalyptastyrǵan.
