Astanada «Áıgili Ázaǵa» kitabynyń tusaýkeseri ótti

Jaqynda Astanadaǵy «Folıant» baspasynan jaryq kórgen Qazaqstannyń halyq jazýshysy, Memlekettik jáne A.A.Fadeev atyndaǵy halyqaralyq syılyqtyń laýreaty,  qazaqtyń birtýar perzenti Ázilhan Nurshaıyqov týraly «ÁIGІLІ ÁZAǴA» atty estelikter men esseler jınaǵyn  qurastyrǵan belgili jýrnalıst, fılologııa ǵylymdarynyń kandıdaty, L.N.Gýmılev atyndaǵy Eýrazııa ulttyq ýnıversıtetiniń dotsenti Muratbek Toqtaǵazın.

Kitapqa 72 avtor engen, kólemi 35 baspa tabaq. Onyń 55-i estelikter men esseler jazǵandar bolsa, qalǵan 17-si Ázaǵańa óleń arnaǵan aqyndar.

 «Áıgili Ázaǵa» Qazaqstan Jazýshylar Odaǵy basqarmasynyń tóraǵasy, Qazaqstan Respýblıkasy Memlekettik syılyǵynyń laýreaty Nurlan Orazalınnyń «Órisi keń órkendi tulǵa» atty alǵysózimen ashylǵan. Odan keıin Ulttyq  Ǵylym akademııasynyń akademıgi, Qazaqstan Parlamenti Senatynyń depýtaty Ǵarıfolla Esimniń («Jany jomart jan edi»), professor, fılologııa ǵylymdarynyń doktory Tursynbek Kákishevtiń («Qos qanatty daryn»), Qazaqstannyń halyq jazýshylary Qabdesh Jumadilov («Ádilet úshin alysqanbyz...») pen Ákim Tarazıdyń («Shyndyqtyń shyraqshysy edi») júrekjardy estelikteri ornalasqan. Odan keıin halqymyzdyń birtýma perzentteri Qazaqstan Respýblıkasy Parlamenti Májilisiniń depýtattary Abaı Tasbolatov, Nurtaı Sábılıanov, Baqytbek Smaǵul, Qazaqstan Respýblıkasyna eńbek sińirgen qaıratkeri, professor, jazýshy Ábilfaıyz Ydyrysov pen belgili aqyn Myńbaı Rásh aǵanyń syrǵa toly oı-tolǵanystary jarııalanǵan. Medeý Sárseke, Orazaqyn Asqar, Sapabek Ásipuly, Baqytjan Momyshuly, Kádirbek Segizbaıuly, Toqtar Beıisqulov, Mamytbek Qaldybaı, Áshirbek Kópish, Ádilǵazy Qaıyrbekov, Aıgúl Kemelbaeva, Roza Muqanova sekildi qalamgerlerdiń  estelikteri bar. Árqaısysy asyl aǵanyń jurt bile bermeıtin tyń derekterin kórkem tilmen móldirete jazǵan.

Belgili qalamgerler Sarbas Aqtaev, Ýaqap Qydyrhanuly, Mamadııar Jaqyp, Qasymhan Ersarın, Qaısar Álim, Qalı Sársenbaı  tárizdi qalamgerler oqyrman qaýymdy beı-jaı qaldyrmaıtyn jaıttardy tilge tıek etip, qarymdy qalamger beınesin ár qyrynan músindegen. Kitapta bir top ǵylym doktorlarynyń estelikteri bar. Olar: Beket Turǵaraev,  Arap Espenbetov,  Qulbek Ergóbek, Qanseıit Ábdezuly, Esbergen Alaýhan, Baýyrjan Omarov, Nurdáýlet Aqysh, Rahymjan Turysbek. Ázaǵańnyń shyǵarmashylyǵynan kandıdattyq dıssertatsııa qorǵaǵan bes adamnyń barlyǵy estelikterin usynypty. Olar Sálıma Qalqabaeva, Qarlyǵash Nurymova, Shaıza Doskeeva, Araılym Kenjeǵarına, Muratbek Toqtaǵazın.

Ázaǵamen týystyq baılanysy bar shymkenttik aqsaqal, Ońtústik Qazaqstan oblysynyń qurmetti azamaty Nur-Muhamed qajy Ájimetuly,  sonymen qatar Á. Nurshaıyqovtyń dostary ári baýyrlary bolyp ketken Ábdisaly Baınazarov, Moldáli Qoldas, Serikqazy Qorabaı, Adaı Azamatov, Naǵashybek  Qapalbekuly, Eleýsin Beısenov, Baǵlan Batyrshaev, Gúlnar Baısalamova, Sergeı Azımovtar tamasha estelikterin jarııalapty.

Jeztańdaı ánshi, Qazaqstannyń halyq ártisi Roza Rymbaeva men kezinde qalamger aǵamyzǵa únemi qamqorlyq kózqaraspen qaraǵan qoǵam jáne ǵylym qaıratkeri Shámshá Berkimbaeva, Ázaǵanyń qyzy, ál-Farabı atyndaǵy Qazaq ulttyq ýnıversıtetiniń kafedra meńgerýshisi, fılologııa ǵylymdarynyń doktory, professor Janar Nurshaıyqova da tamasha lebizderin shyn yqylaspen jazypty.

Sonymen qatar «Áıgili Ázaǵa» kitabynda estelikterin usynǵan avtorlar týraly Ázilhan Nurshaıyqovtyń ádebı kúndelikterinde jazyp ketken lebizderin «Qosymshalar men túsinikter» degen bólimde «ÁZAǴAŃ...DEGEN EKEN nemese estelik jazǵan avtorlar týraly jazýshy jazbalarynan» atty qosalqy pikirler tsıkly berilipti. Onda estelik jazýǵa qatysýshylardyń kópshiligi týraly baǵa berilgen oı-tujyrymdar jeterlik. Sondyqtan muny osy kitaptyń formalyq ereksheligi deýge bolady.

Astanadaǵy «Folıant» baspasy kitapty óz esebinen shyǵarypty. Bastamany atalmysh baspanyń dırektory, ultjandy ári jaısań azamat Nurlan Isabekov qyzý qoldapty. Al kitapty alǵysy kelgen oqyrmandar atalmyş baspaǵa habarlasýlaryna bolady.

24 sáýirde L.N. Gýmılev atyndaǵy Eýrazııa ulttyq ýnıversıtetinde osy oqý ordasynyń rektory Erlan Báttáshuly Sydyqovtyń bastamasymen ǵalym-jýrnalıst Muratbek Toqtaǵazınniń qurastyrýymen shyqqan «Áıgili Ázaǵa» jınaǵynyń jáne osy avtordyń «Derektilik pen kórkemdik» atty kitabiniń tusaýkeser rásimi bolyp ótti. Onda Qazaqstanǵa belgili zııaly qaýym ókilderi atalmysh kitaptar jaıly jyly lebizderin bildirip, kesh sońynda Á. Nurshaıyqovtyń «Mahabbat, qyzyq mol jyldar» romany negizinde stýdenttik «Shańyraq» teatry ázirlegen spektakldyń premerasy boldy.

Ádebı-mádenı shara barysynda Qazaqstan Respýblıkasy Parlamenti Májilisiniń depýtattary Abaı Tasbolatov, Baqytbek Smaǵul, respýblıkalyq «Egemen Qazaqstan» gazeti» aktsıonerik qoǵamynyń prezıdenti Saýytbek Abdrahmanov, belgili ardager telejýrnalıst Sultan Orazalınov,  fılologııa ǵalymdarynyń doktory, professor Raqymjan Turysbek sóz sóılep, avtordyń qos kitaby týraly jáne Ázaǵa haqynda jyly lebizderin bildirdi.

Eske alý keshi sońynda L.N.Gýmılev atyndaǵy Ulttyq ýnıversıteti janynan qurylǵan «Shańyraq» stýdenttik teatry «Mahabbat, qyzyq mol jyldar» romany jelisimen ázirlengen spektakldiń premerasy qoıyldy.