Astanada áıelin balkonnan ıterip jibergen er adam 3 jylǵa sottaldy

ASTANA. QazAqparat – Elordalyq Almaty aýdanynyń №2 soty otbasylyq janjaldan keıin jubaıyn balkonnan qulatqan turǵynǵa aıyptaý úkimin shyǵardy, dep habarlaıdy QazAqparat qalalyq sottyń saıtyna silteme jasap.

Er adam mas kúıinde úı ishinde janjal shyǵaryp, áıelin uryp-soqqan jáne tunshyqtyryp, balkonnyń terezesinen shyǵaryp, 2-qabattan laqtyryp jibergen.

Saldarynan áıeldiń densaýlyǵyna aýyr zaqym kelgen.

Er adam óz kinásin moıyndady, ony jábirlenýshiniń aıǵaqtary men sot saraptamasy qorytyndysy jáne istiń basqa materıaldary da rastady.

Prokýror aıyptaýdy qoldady.

Sot qylmystyq jaýapkershilik pen jazany jeńildetetin mán-jaı retinde sottalýshynyń shyn júrekten ókingenin nazarǵa aldy.

Odan bólek, mas kúıinde qylmys jasaýdy aýyrlatatyn jaǵdaı dep tanydy.

QR Qylmystyq kodeksiniń 106-babynyń 1-bóliginiń sanktsııasy (densaýlyqqa qasaqana aýyr zııan keltirý) 3 jyldan 8 jylǵa deıin bostandyqty shekteý nemese aıyrý túrindegi jazany kózdeıdi.

Sot úkimimen er adam densaýlyqqa qasaqana aýyr zııan keltirgeni úshin kináli dep tanylyp, 3 jylǵa bas bostandyǵynan aıyryldy.

Sot úkimi zańdy kúshine endi.