Astanada «Áıeldiń mahabbaty men ómiri» atty mýzykalyq kesh ótedi
ASTANA. QazAqparat - Kóktemniń merekelik kúnderinde «Astana Opera» Kameralyq zalynda «Áıeldiń mahabbaty men ómiri» atty mýzykalyq kesh ótedi, dep habarlaıdy QazAqparat teatrdyń baspasóz qyzmetine silteme jasap.
9 naýryz kúni elordalyqtar men qala qonaqtaryn teatrdyń jetekshi solısi, tanymal ánshi-soprano, Qazaqstannyń eńbek sińirgen qaıratkeri Aıgúl Nııazova, sonymen birge aıtýly aspapshylar óz ónerlerimen qýantpaq.
«Mýzyka jáne onyń shyǵarýshylary týraly» toptamasynyń kontsertine mýzykanttar: Qazaqstannyń eńbek sińirgen ártisi Maqpal Bekmaǵambetova (skrıpka), halyqaralyq baıqaýlardyń laýreattary Jibek Saparǵalıeva (fleıta), Asqar Muqanov (vıolonchel), Ábdiahmet Orazbaqov, Raýshan Beskempirova (fortepıano) qatysady.
Tyńdarman nazaryna nemis romantık-kompozıtory Robert Shýmannyń shabytqa toly shyǵarmalary usynylady. A.Shamıssonyń sózine jazylǵan daýys pen fortepıanoǵa arnalǵan «Áıeldiń mahabbaty men ómiri» atty vokaldyq toptama, or. 42 shyrqalady. Atalǵan týyndyda avtor jas boıjetkenniń eseıýi: alǵashqy kezdesýi, nekelesýi, úılený toıy, ana baqytyn sezinýi men súıiktisin joǵaltýy týraly qarapaıym oqıǵany baıandaı otyryp, áıel tulǵasyna, onyń jan-júreginiń syrly túpkirlerine kóńil bóledi.
Segiz ánnen turatyn toptama 1840 jyly kompozıtor qanshama kúsh-jigerin salyp súıgen áıeli - ataqty pıanınoshy Klara Vıktiń oń jaýabyna qol jetkizgen kezde jazylǵan bolatyn.
Osy týyndy Aıgúl Nııazovanyń repertýarynda erekshe orynǵa ıe. «Astana Opera» jetekshi solısi altynshy «Jeztańdaı bulbul» kameralyq án salý halyqaralyq baıqaýynda ataqty vokaldyq toptamadan nómirler oryndap, tanymal baıqaý tarıhyna Qazaqstannan shyqqan jalǵyz laýreat retinde engen.
«R.Shýman týyndylarynyń negizgi ıdeıasy - baqyt. Munda áıel janynyń qupııalyǵy berilip qana qoımaı, onyń boıyndaǵy ishki kúsh-qýattyń kóp ekeni kórsetilgen. Sońy qaıǵyly bolǵanyna qaramastan, shyǵarma tamasha aspaptyq postlıýdııamen aıaqtalady, onyń áýeninen jarqyn bolashaqqa degen senim notalary oryn alady. Osy tebirenter aıanyshty tarıh shynaıy da áserli ún qatady. Shynaıy súıe bilgen ári mahabbatyna qol jetkize bilgen R.Shýman asqaq sezimdi tereń uǵynyp, osyndaı keremet týyndyny jazǵan. Osy mýzykada vokaldyq jáne aspaptyq partııa ózara tyǵyz baılanysqan, ánshi men pıanıst aldynda ansambldik oryndaýshylyq turǵysynan úlken mindetter qoıylǵan. Onyń ústine nemis tilinde án oryndaýdyń ózindik kúrdeli ereksheligi bar, oǵan aıryqsha yrǵaq, ıntonatsııalyq dáldik pen fonetıkalyq aıqyndyq qajet», - dedi Aıgúl Nııazova.
