Astanada áıelderge qoldaý kórsetetin «Baqytty otbasy» ortalyǵy ashyldy

NUR-SULTAN. QazAqparat – Búgin Nur-Sultan qalasynda áıelderge arnalǵan qoldaý kórsetý jáne bilim berý ortalyǵy ashyldy, dep habarlaıdy QazAqparat tilshisi.

Áıelderge arnalǵan ortalyqtyń ashylý saltanatyna QR Premer-Mınıstriniń orynbasary Eraly Toǵjanov, elorda ákimi Altaı Kólginov jáne taǵy basqa qurmetti qonaqtar qatysty.

Jańa ortalyqty qurýdaǵy maqsat – kópbalaly, ómirde qıyn jaǵdaıǵa tap bolǵan, jalǵysbasty jáne erekshe bala tárbıelep otyrǵan analarǵa qoldaý kórsetý.

«Qurmetti ájeler, analar jáne barsha názik jandar! Taıaýda ǵana Memleket basshysy Qazaqstan halqyna kezekti Joldaýyn usyndy. Bul tarıhı Joldaý boldy. Biz úshin Táýelsizdikten qundy baılyqtyń joqtyǵyn únemi aıtyp júremin. Táýelsizdiktiń tiregi – bizdiń analarymyz. Balany tárbıelep, azamat etý isimen ana aınalysady. El prezıdentteri men erjúrek batyrlardy da tárbıelegen ana. Ana - bárimiz úshin qymbat jan. Osy oraıda biz analardy, onyń ishinde kópbalaly analarymyzdy qoldap, kómek kórsetýimiz kerek», - dedi Úkimet basshysynyń orynbasary Eraly Toǵjanov ataýly sharada.

Qolónermen aınalysamyn deýshi jandarǵa ulttyq kıimder, buıymdar jáne balalarǵa arnalǵan oıynshyq tigýdi úıretedi.

Sondaı-aq, ortalyqta áıelderge tegin psıhologııalyq, medıtsınalyq jáne zań qyzmeti usynylady.

«Bizdiń ortalyqqa kelgen árbir jandy qýana qarsy alamyz. Ortalyqty ashý - aıaq astynan júzege asyrylǵan sharýa. Árıne, qoldaý bolmasa óz kúshimizben ortalyq asha almas edik. Ortalyqtyń ashylýyna osyndaǵy qyz-kelinshekter men analardyń eńbegi zor», - deıdi «Baqytty otbasy» ortalyǵynyń jetekshisi Yrza Tursynzada.

Aıta ketsek, Naýryz meıramy qarsańynda ashylǵan ortalyqta 19-20 naýryz kúnderi «Kórpe fest-2022» festıvali ótpek.

Odan bólek, 21-22 naýryz kúnderi Mega Silk Way oıyn-saýyq jáne saýda ortalyǵynda kópbalaly analar jáne az qamtylǵan otbasylarǵa arnalǵan jármeńke uıymdastyrylady.