Astanada áıelder kásipkerligin qoldaý sharalaryn túsindirý naýqany jalǵasyp jatyr
ASTANA. KAZINFORM — Elordada jyl sońyna deıin halyqqa áıelder kásipkerligin memlekettik qoldaý sharalaryn túsindirýge baǵyttalǵan Ulttyq aqparattyq naýqan jalǵasyp jatyr, dep habarlaıdy Astana qalasy ákimdiginiń resmı saıty.
Naýqan 22-31 jeltoqsan aralyǵynda Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń bastamasymen Astana qalasynyń Investıtsııalar jáne kásipkerlikti damytý basqarmasy arqyly júzege asyrylyp jatyr.
— Naýqan aıasynda elordada áıelderdiń kásipkerlik áleýetin qoldaýǵa, sondaı-aq bıznesti bastaý men damytý úshin qolaıly jaǵdaı jasaýǵa baǵyttalǵan aqparattyq-túsindirý is-sharalary uıymdastyrylyp jatyr. Bastamanyń negizgi maqsaty — áıelderge memlekettik qoldaý tetikteri, granttar men jeńildetilgen nesıeleý, oqytý jáne keńes alý múmkindikteri týraly naqty ári qoljetimdi aqparat berý, — delingen habarlamada.
Іs-sharalar barysynda memlekettik baǵdarlamalardyń tanystyrylymdary, semınarlar, kezdesýler men dóńgelek ústelder ótkiziledi.
Sondaı-aq óńirlik deńgeıde tabysty áıelder kásipkerliginiń úzdik úlgilerin nasıhattaýǵa erekshe kóńil bólinip otyr. Naýqanǵa memlekettik organdardyń ókilderi, «Atameken» kásipkerler palatasy, «Damý» qory, qarjy ınstıtýttary, qoǵamdyq uıymdar jáne áıel-kásipkerler qatysyp jatyr.
Ulttyq aqparattyq naýqandy ótkizý áıelder kásipkerligin qoldaýǵa baǵyttalǵan memlekettik saıasatty iske asyrýmen tyǵyz baılanysty. Búginde áıelder kásipkerligi Qazaqstannyń turaqty ekonomıkalyq ósýiniń negizgi qozǵaýshy kúshteriniń biri retinde qarastyrylyp otyr.
Qazaqstanda áıelder kásipkerligin memlekettik qoldaý keshendi sıpatqa ıe. Qarjylyq quraldar — granttar men jeńildetilgen nesıeleýmen qatar, bilim berý jáne mentorlyq baǵdarlamalarǵa da erekshe basymdyq beriledi.
Budan buryn Astanada ár senbi-jeksenbi kúnderi ótetin «Soǵym Fest» et jármeńkesi 27 jeltoqsannan 31 jeltoqsanǵa deıin 5 kúnge uzartylǵany anyqtaldy.