Astanada áıelder arasyndaǵy bokstan álem chempıonatynda 12 olımpıadalyq joldama sarapqa salynady
ASTANA. QazAqparat - Astanada ótetin bokstan áıelder arasyndaǵy álem chempıonaty aýqymynda Rıo-de-Janeırodaǵy Olımpıadalyq oıyndarǵa 12 joldama sarapqa salynady, dep habarlady Qazaqstandyq boks federatsııasy.
Rıo-2016 olımpıadalyq joldamalary: 51 kelige deıingi, 60 kelige deıingi jáne 75 kelige deıingi úsh salmaq sanatynda oınalady. Ár sanatta tórt joldamadan bolady.
Eske sala keteıik, Astanadaǵy bokstan áıelder arasyndaǵy álem chempıonaty 19-27 mamyr kúnderi «Barys-Arena» muz saraıynda ótedi. Qazaqstan on salmaq sanatynda 10 qyzdy úkilep qospaq. Qurama quramynda astanalyq Rımma Volosenko, Valentına Halzova jáne Lázzat Kúngeıbaeva kirdi. Sondaı-aq rıngte Nazym Qyzaıbaı, Jaına Shekerbekova, Dına Jolaman, Aıjan Qojabekova, Zarına Tsoloeva, Vıoletta Knıazeva jáne ıÝldýz Mamatkýlova el namysyn qorǵaıdy.
Chempıonatqa 326 boksshy qatyspaq - bul áıelder chempıonaty úshin rekordtyq san. Álem birinshiliginde Iordanııa, Mozambık jáne Serra-Leone ókilderi alǵash ret qatysqaly otyr.
«Altynnan» dámelilerdiń qatarynda ırlandyq Ketı Teılordyń, úndistandyq sportshy Merı Komnyń, amerıkandyq Klaressý Shıldstiń, brıtandyq Nıkola Adamstyń jáne qytaılyq Ren Kankannyń esimderi atalyp júr.
Komandalardyń kópshiligi Astanaǵa kelip jetti, olar úsh bazada - boksty damytý ortalyǵynda, «Tolqyn» sport kesheninde jáne Astana-Arenada jattyǵyp jatyr. Bizdiń sportshylar AQSh, Fınlıandııa jáne Chernogorııa komandalarymen birlesken jattyǵýlar ótkizdi.
«Astanadaǵy álem chempıonaty kezekti ret búkil álemdegi áıelder boksynyń mártebesin kóteredi, - dep málimdedi AІVA prezıdenti Chıng-Kýo Vý. - Bizdiń bárimiz de oǵan ańyzǵa aınalǵan chempıondar men jas talanttar qatysatynyn maqtan etemiz».
